काठमाडौं । नेकपा एमाले परित्याग गरेर प्रतिनिधिसभा चुनाव लडेका घनश्याम भुसाल नेकपा एकीकृत समाजावादीमा प्रवेश गर्ने भएका छन्।
उनी औपचारिक रुपमा एकीकृत समाजवादी पार्टीमा संलग्न हुने तयारीमा रहेको स्रोतले बताएको छ। ‘१-२ दिनमा यस विषयमा औपचारिक घोषणा हुनेछ‚’ भुसालनिकट स्रोतले भन्यो, ‘अहिलेसम्म भएको तयारीअनुसार बिहीबार औपचारिक कार्यक्रम हुन्छ।’
भुसालले एकीकृत समाजवादीको एकता कार्यदललाई कम्युनिस्ट आन्दोलनको पुनर्गठन, रुपान्तरण र एकीकरणका लागि प्रस्ताव पनि पठाएका छन्।
मंसिर ४ गते भएको प्रतिनिधिसभा निर्वाचनमा रुपन्देही १ बाट स्वतन्त्र उम्मेदवारी दिएका भुसालले एमालेका छविलाल विश्वकर्मासँग पराजित भएका थिए। त्यसयता एकीकृत समाजवादीको नेतृत्वसँग पटक-पटक छलफल गर्दै आएका थिए।
