समितिका सहसचिव कान्छा दुलालका अनुसार अनुगमन गर्ने निर्णय भए पनि मिति भने तय भइसकेको छैन । समितिभित्र छलफल गरेर उपयुक्त समयमा टोली बनेपा जाने तयारी भइरहेको उनले जानकारी दिए ।
बैठकमा भौतिक पूर्वाधार तथा यातायात मन्त्रालय, सहरी विकास मन्त्रालय तथा भूमि व्यवस्था सम्बन्धित निकायका प्रतिनिधिहरू उपस्थित थिए । सो क्रममा सुकुमबासी बस्ती हटाउने क्रममा डोजर प्रयोग गरिएको विषयमा सांसदहरूले सरकारसँग स्पष्टीकरण माग गरेका थिए ।
सहरी विकास मन्त्री सुनिल लम्सालले विस्थापित भएका परिवारलाई बेवास्ता नगरिएको दाबी गरे । उनले प्रभावित परिवारलाई पुनःस्थापनालाई प्राथमिकतामा राखेर काम भइरहेको उल्लेख गर्दै बालबालिका, ज्येष्ठ नागरिक, सुत्केरी र अपाङ्गता भएका व्यक्तिलाई समस्या नपर्ने गरी व्यवस्थापन गरिएको बताए । कुनै नागरिक समस्यामा परेको पाइए तत्काल समाधानका लागि सरकार तयार रहेको उनको भनाइ थियो ।
बैठकमा केही सांसदहरूले विद्यालय भवन भत्काइँदा विद्यार्थी प्रभावित भएको विषय पनि उठाएका थिए । त्यसको जवाफमा भूमि व्यवस्था मन्त्री प्रतिभा रावलले विद्यार्थीको पढाइ नरोकिएको स्पष्ट पारिन् । उनका अनुसार प्रभावित विद्यार्थीलाई वैकल्पिक विद्यालयमा व्यवस्थापन गरिएको छ ।
