काठमाडौं । काठमाडौँ उपत्यकामा सुकुमबासी बस्ती हटाउने सरकारी अभियान शुक्रबार पनि निरन्तर रह्यो। टेकुस्थित बंशीघाट क्षेत्रमा रहेका घरटहरा डोजर प्रयोग गरी हटाइएपछि स्थानीय क्षेत्रमा ठूलो भीड लागेको थियो।
बस्ती भत्काउने क्रममा प्रभावित परिवारहरू आफ्नो सामान जोगाउन व्यस्त देखिएका थिए भने दृश्य अवलोकन गर्न सर्वसाधारणको उपस्थिति पनि उल्लेख्य थियो। यसअघि नै सूचना जारी गरिए पनि हटाउने प्रक्रिया सुरु भएपछि धेरै परिवार आकस्मिक रूपमा प्रभावित भएको देखिएको छ। आजै शंखमूल र बालाजु क्षेत्रमा पनि यस्तै अभियान सञ्चालन गरिएको छ। केही स्थानमा बासिन्दाले आफैं संरचना भत्काएर सामान सार्ने प्रयास गरेका थिए भने अन्य ठाउँमा सुरक्षाकर्मीको उपस्थितिमा डोजर प्रयोग गरिएको थियो।
सरकारले यसअघि थापाथली, गैरीगाउँ लगायतका क्षेत्रमा पनि बस्ती हटाइसकेको छ। नदी किनार तथा सार्वजनिक जग्गा अतिक्रमण हटाउने अभियानअन्तर्गत यी कारबाहीहरू भइरहेको जनाइएको छ।
सरकारको तर्क अनुसार सार्वजनिक जग्गा संरक्षण र नदी क्षेत्रको व्यवस्थापन आवश्यक भए पनि, पुनर्स्थापनाको स्पष्ट योजना बिना गरिएको यस्तो अभियानमाथि आलोचना बढ्दै गएको छ। विशेषगरी बस्ती हटाउने कार्य तीव्र भइरहँदा प्रभावित परिवारहरूको तत्कालीन बसोबास, रोजगारी र बालबालिकाको शिक्षामा पर्ने असरबारे पर्याप्त ध्यान नदिएको आरोप लागिरहेको छ।
बंशीघाटमा देखिएको भीड केवल ‘दृश्य’ हेर्न जम्मा भएको मात्र नभई, शहरभित्र बढ्दै गएको सामाजिक असमानताको संकेत पनि मानिएको छ। डोजरले संरचना हटाए पनि, विस्थापितहरूको समस्या भने यथावत् रहने भएकाले दीर्घकालीन समाधानको आवश्यकता झन् टड्कारो बनेको छ।
