काठमाडौं। आइसिसी क्रिकेट विश्वकप लिग–२ अन्तर्गत नेपालले आज ओमानसँग प्रतिस्पर्धा गर्दैछ। खेल बिहान साढे ९ बजे त्रिवि क्रिकेट मैदानमा सुरु हुनेछ।
आठ टोली सहभागी प्रतियोगितामा नेपाल हाल पुछारबाट दोस्रो स्थानमा छ। शीर्ष चारमा पर्ने टोलीले एकदिवसीय विश्वकपको ग्लोबल छनोट खेल्ने व्यवस्था छ भने तल्लो चार टोलीले प्लेअफ क्वालिफायर खेल्नुपर्ने हुन्छ। यसैले घरेलु मैदानमा भइरहेको शृङ्खलाका सबै खेल जित्दै शीर्ष चारको सम्भावना जोगाइराख्ने लक्ष्य नेपालले राखेको छ।
नेपालले पहिलो खेलमा संयुक्त अरब इमिरेट्स (युएई) लाई पराजित गरिसकेको छ र आज ओमानविरुद्ध पनि जितको निरन्तरता कायम राख्ने प्रयासमा छ।
अहिलेसम्म नेपालले २१ खेलबाट १४ अङ्क जोडेको छ। ओमान भने २५ खेलमा २९ अङ्कसहित तेस्रो स्थानमा छ।
नेपाल र ओमानबीच हालसम्म आठ एकदिवसीय अन्तर्राष्ट्रिय खेल भएका छन्। तीमध्ये नेपालले तीन र ओमानले चार खेल जितेका छन् भने एक खेल रद्द भएको थियो।
