काठमाडौँ । तीन ब्याटरको अर्धशतक प्रेरणामा नेपाल ‘ए’ क्रिकेट टोलीले ओमानसँगको दोस्रो एकदिवसीय खेलमा ११५ रनको जित निकाल्दै दुई खेलको श्रृंखला बराबरी गरेको छ ।
मूलपानीमा शुक्रबार भएको खेलमा ब्याटिङमा उत्कृष्ट प्रदर्शन गरेपछि नेपाल ‘ए’ ले ओमानलाई सहजै पराजित गरेको हो ।
टस हारेर पहिले ब्याटिङ गरेको नेपाल ‘ए’ ले ७ विकेटको क्षतिमा २८४ रन बनाएको थियो । देव खनाल (६४), ईशान पाण्डे (६९) र कुशल मल्ल (५७) ले अर्धशतकीय योगदान दिए ।
जवाफी ब्याटिङमा ओमान ३६.३ ओभरमा १६९ रनमै अलआउट भयो । मुजिबुर अलीले सर्वाधिक ४३ रन बनाए भने जितेनकुमार र विनायक शुक्लाले क्रमशः २४ र २१ रन जोडे ।
नेपालको बलिङमा युवराज खत्रीले ३ विकेट लिए भने हेमन्त धामी, आकाश चन्द र शेर मल्लले समान २ विकेट हात पारे ।
यस जितसँगै नेपाल ‘ए’ ले पहिलो खेलमा व्यहोरेको ७० रनको हारको बदला लिँदै श्रृंखला १–१ को बराबरीमा पुर्याएको छ ।
