काठमाडौं । सुनसरीको धरान उपमहानगरपालिकामा निर्माणाधीन प्रहरी चौकीमाथि भएको तालाबन्दी र त्यसपछिको तालाखोलाइले स्थानीय तहको नेतृत्वभित्रको गहिरो मतभेदलाई उजागर गरेको छ। एकातिर मेयर हर्कराज साम्पाङ्ग चौकी निर्माणको विरोधमा उभिएका छन्, अर्कोतिर वडाध्यक्ष मुरारीप्रसाद भट्टराई भने कुनै हालतमा काम नरोकिने अडानमा छन्।
गएराति वडा नं. १६ को नौंलो बस्तीस्थित बहुभाषिक पाठशालाको कम्पाउन्डभित्र निर्माणाधीन चौकीमा तालाबन्दी गरिएको थियो। भोलिपल्ट बिहान वडाध्यक्ष भट्टराई आफैं पुगेर तालाचाबी खोलेर निर्माण कार्य अघि बढाएका हुन्। वडाध्यक्ष भट्टराई भन्छन्, ूकाममा लाखौं खर्च भइसकेको छ, स्थानीयको चाहना पनि प्रहरी चौकी निर्माण हो। अब रोक्ने प्रश्नै उठ्दैन।
नेतृत्वको अराजकता — कार्यपालिका बैठकमा निर्णय गरेर स्वीकृत भएको योजनाको अब मेयर स्वयं विरोधमा उभिनुले मेयरको निर्णयमा स्थिरता र स्पष्टताको अभाव देखाउँछ। समर्थकद्वारा तालाबन्दी — स्थानीय तहको जनप्रतिनिधिका समर्थकहरू कानुनभन्दा माथि हुने अवस्था बनाउनु खतरनाक संकेत हो। यस्तो शैलीले लोकतान्त्रिक प्रक्रियाको मजाक उडाउँछ।
समन्वयहीन प्रशासन — एकै नगरपालिकाभित्र दुई निर्वाचित प्रतिनिधिबीचको यस्तो दोहोरो ध्रुवीकरणले स्थानीय विकास कार्य प्रभावित हुनुका साथै जनताको भरोसा कमजोर बनाउँछ। यो घटनाले धरानको स्थानीय सरकारभित्र शक्ति संघर्ष, अहंकार, र निर्णय प्रक्रिया प्रति बेवास्ता देखाएको छ। मेयर र वडाध्यक्षबीचको यो टकरावले प्रहरी चौकीको सवालभन्दा पनि नेताहरूबीचको स्वार्थ र प्रतिद्वन्द्वितालाई प्राथमिकतामा राखिएको आभास दिन्छ।
प्रशासनिक समन्वयको गम्भीर अभावको यो नमूना घटना अब धरानका जनताले राजनीतिक ‘ड्रामा’ होइन, स्पष्ट निर्णय र जवाफदेहिता माग गर्नुपर्ने संकेत हो।
