काठमाडौँ। संघीय संसद्, संसदीय सुनुवाइ समितिले आज प्रस्तावित न्यायाधीशविरुद्ध उजुरी दिने उजुरीकर्ताहरूसँग छलफल गरेको छ ।
सर्वोच्च अदालतको न्यायाधीशमा प्रस्तावित मेघराज पोखरेल, श्रीकान्त पौडेल र शान्तिसिंह थापा विरुद्ध ५ वटा उजुरी परेको थियो ।
जसमध्ये प्रस्तावित न्यायाधीश पोखरेल र श्रीकान्त पौडेलविरुद्ध दुई/दुई वटा उजुरी परेको थियो भने अर्का प्रस्तावित न्यायाधीश शान्तिसिंह थापाविरुद्ध एउटा उजुरी परेको थियो ।
न्यायपरिषद्को सदस्यमा सिफारिस हुनुभएका महेशकुमार नेपालका विरुद्ध कुनै पनि उजुरी परेको थिएन । समितिको प्रक्रियाका विषयमा उजुरी हाल्ने एक जना उजुरीकर्तासँग पनि समितिले छलफल गरेको छ ।
उजुरीकर्तासँग छलफल सकेको समितिले अगामी आइतबार सर्वोच्च अदालतका लागि प्रस्तावित न्यायाधीश र न्यायपरिषद् सदस्यको संसदीय सुनुवाई गर्ने निर्णय गरेको छ ।
