काठमाडौं । प्रधानमन्त्री शेरबहादुर देउवाले मन्त्रिपरिषद् बैठक बोलाएका छन् । दिउँसो २ बजेका लागि देउवाले मन्त्रिपरिषद् बैठक बोलाएको सरकारका प्रवक्ता ज्ञानेन्द्रबहादुर कार्कीले जानकारी दिए ।
नेपाली कांग्रेसको पदाधिकारी र पूर्वपदाधिकारीको बैठक स्थगित गर्दै देउवाले मन्त्रिपरिषद् बैठक बोलाएका हुन् । बैठक प्रधानमन्त्री तथा मन्त्रिपरिषद्को कार्यालय सिंहदरबारमा बस्नेछ । आजको बैठकबाट केही महत्वपूर्ण निर्णय हुनसक्ने समेत बताइएको छ ।
हिजो मात्रै प्रधानमन्त्री देउवा एमालेका वरिष्ठ नेता माधवकुमार नेपाललाई भेट्न उनकै निवासमा पुगेका थिए । भेटमा देउवाले आफ्नो सरकारमा सहभागी हुन नेपाल पक्षलाई आग्रह गरेका थिए । यसमा नेता नेपालले अहिले सरकारमा सहभागी नहुने जवाफ दिएको स्रोतको दाबी छ । तर, विश्वासको मत भने दिने उनको वचनबद्धता थियो ।
स्रोतका अनुसार प्रधानमन्त्री देउवाले नेता नेपाललाई एमालेभित्र अप्ठ्यारो भए त्यसका गाँठो फुकाउनसमेत आफू तयार रहेको विश्वास दिलाएका थिए ।
