काठमाडौं । त्रिभुवन विश्वविद्यालय ९त्रिवि० ले आफ्नो स्वामित्वमा रहेको जग्गा फिर्ता ल्याउने अभियान सुरु गर्दै १७ वटा संघ–संस्थालाई ३५ दिनभित्र कब्जा गरिएको जमिन खाली गर्न निर्देशन दिएको छ।
विश्वविद्यालयको सामान्य प्रशासन महाशाखाले वैशाख ४ गते सार्वजनिक सूचना जारी गर्दै अतिक्रमण गरी बसेका संघ–संस्था र संगठनलाई समयसीमा दिएको थियो। सोही सूचनाको आधारमा सम्बन्धित १७ संस्थालाई औपचारिक पत्राचार गरिएको महाशाखा प्रमुख राजबहादुर राईले जानकारी दिए। त्रिविको जग्गा तथा अचल सम्पत्ति छानबिन समितिको प्रतिवेदनअनुसार विश्वविद्यालयको ठूलो परिमाणको जमिन विभिन्न संस्था, निजी निकाय तथा धार्मिक समूहले प्रयोग गर्दै आएको पाइएको छ।
प्रतिवेदनले त्रिविको २ हजारभन्दा बढी रोपनी जग्गा बाह्य प्रयोगमा रहेको देखाएको छ। त्यसमध्ये कीर्तिपुर क्षेत्रमा मात्र करिब १ हजार ५ सय रोपनी जमिन विभिन्न संस्थाको भोगचलनमा पुगेको उल्लेख छ। दीर्घकालदेखि बेवास्ता र कमजोर निगरानीका कारण विश्वविद्यालयको सम्पत्ति अतिक्रमणमा परेको भन्दै अहिले त्यसलाई व्यवस्थित रूपमा फिर्ता ल्याउने प्रक्रिया अघि बढाइएको जनाइएको छ। त्रिविको यो कदमलाई सार्वजनिक सम्पत्ति संरक्षणतर्फको पहलका रूपमा हेरिए पनि व्यवहारमा कार्यान्वयन कत्तिको प्रभावकारी हुन्छ भन्ने प्रश्न भने अझै खुला छ।
