काठमाडौं । सत्तारुढ नेकपा एमालेका प्रमुख सचेतक महेश बर्तौलाले सरकारले प्रस्तुत गरेको आगामी आर्थिक वर्षको नीति तथा कार्यक्रम प्रगतिशील, व्यावहारिक र जनमुखी भएको दाबी गरेका छन्। उनका अनुसार नीति तथा कार्यक्रमले देशभर व्याप्त निराशालाई हटाई जनतामा आशा र उत्साहको सञ्चार गरेको छ।
आज संसद्को बैठकमा सम्बोधन गर्दै बर्तौलाले नीति तथा कार्यक्रमले देशलाई तीव्र आर्थिक वृद्धिको मार्गतर्फ लैजान स्पष्ट खाका प्रस्तुत गरेको बताए। उनले विकास, समृद्धि, सुशासन र सेवा प्रवाहलाई प्राथमिकतामा राखेर नीति तय गरिएको उल्लेख गर्दै यसको सफल कार्यान्वयनका लागि सत्तारुढ र विपक्षी सांसदहरूलाई सकारात्मक र प्रभावकारी भूमिका निर्वाह गर्न आह्वान गरे।
बर्तौलाले माओवादी केन्द्रलाई लक्षित गर्दै “जस्तोसुकै राम्रो नीति आए पनि आलोचना गर्ने पुरानो प्रवृत्ति त्याग्नुपर्छ” भन्दै व्यङ्ग्यसमेत प्रहार गरे। उनले रचनात्मक आलोचनाको स्वागत गर्ने तर निराधार आलोचना मात्र गर्ने चरित्रले देशको प्रगति अवरुद्ध हुने जिकिर गरे।
नीति तथा कार्यक्रमको पक्षमा आफूहरू दृढ रहेको भन्दै बर्तौलाले समृद्ध नेपाल र सुखी नेपालीको परिकल्पनालाई वास्तविकता बनाउन सबैले हातेमालो गर्नुपर्नेमा जोड दिए।
