काठमाडौं । जनता समाजवादी पार्टीका अध्यक्ष उपेन्द्र यादवलाई कृषि विश्वविद्यालयको शिलान्यास कार्यक्रमको प्रमुख अतिथि बनाउँदा सप्तरीको राजविराज तनावग्रस्त बनेको छ ।
सिके राउत नेतृत्वको जनमत पार्टीको विरोधका बाबजुद पनि मधेस प्रदेश सरकारले उपेन्द्रलाई विश्वविद्यालय शिलान्यासको प्रमुख अतिथि बनाएको थियो ।
कार्यक्रम स्थगित गर्न भन्दै जनमत पार्टीका नेता कार्यकर्ताले विरोध गरेका थिए । जसपा र जनमत पार्टीका नेता कार्यकर्ताबीच हानाहान हुन थालेपछि प्रहरीले हस्तक्षेप गरेको थियो ।
सो क्रममा मधेस प्रदेशका शिक्षामन्त्री महेशप्रसाद यादव, सांसदहरू सतिशकुमार सिंह, भाग्यश्री चौधरी, रञ्जु खंगसहित घाइते भएका छन् । प्रहरीको लाठीचार्जबाट उनीहरू घाइते भएका हुन् ।
सिके राउत र उपेन्द्र यादवको इगाले अहिले स्थिति तनावग्रस्त बनेको छ । उपेन्द्रलाई प्रमुख अतिथि नबनाउन जनमतले चेतावनी दिँदै आएको थियो ।
