काठमाडौँ। माध्यमिक शिक्षा परीक्षा (एसईई) को नतिजा यस वर्ष करिब एक महिनामै सार्वजनिक भएको छ भने समग्र नतिजामा सुधार देखिएको छ।
राष्ट्रिय परीक्षा बोर्डअन्तर्गत परीक्षा नियन्त्रण कार्यालय (कक्षा १०) ले पूर्वनिर्धारित कार्यतालिकाअनुसार एक महिनामै परीक्षाफल प्रकाशित गरेको हो। शिक्षा, विज्ञान तथा प्रविधिमन्त्री सस्मित पोखरेलको निर्देशनपछि शैक्षिक क्यालेन्डर समयमै कार्यान्वयन हुने अपेक्षा पनि बढेको छ।
यस वर्ष ६५ दशमलव ९८ प्रतिशत विद्यार्थी ‘ग्रेडेड’ भएका छन्। कुल दुई लाख ८४ हजार १६० विद्यार्थी उत्तीर्ण भएका छन् भने एक लाख ४६ हजार ५०७ विद्यार्थी ‘ननग्रेडेड’ भएका छन्। उनीहरूले ग्रेडवृद्धि परीक्षामा सहभागी हुने अवसर पाउनेछन्।
परीक्षामा चार लाख ३० हजार ६६७ विद्यार्थी सहभागी भएका थिए, जसमा छात्रा र छात्रको सहभागिता क्रमशः दुई लाख ५७ हजार ५२७ र दुई लाख ५२ हजार ४३४ रहेको थियो।
गत वर्ष ६१ दशमलव ८१ प्रतिशत विद्यार्थी उत्तीर्ण भएका थिए भने २०८० सालमा यो दर ४७ दशमलव ८७ प्रतिशत मात्र थियो। यस आधारमा नतिजा क्रमशः सुधारोन्मुख देखिएको छ।
शिक्षाविद् प्रा. डा. मनप्रसाद वाग्लेले एक महिनामै नतिजा प्रकाशन हुनु असम्भव जस्तो मानिएको अवस्थामा यो उपलब्धि भएको बताउँदै उत्तरपुस्तिका परीक्षणमा शिक्षकप्रतिको विश्वास नै प्रमुख कारण भएको टिप्पणी गरे। उनका अनुसार शिक्षकको मिहिनेत र जिम्मेवारीले यस्तो सुधार सम्भव भएको हो।
बोर्डका सदस्यसचिव जङ्गबहादुर अर्यालले नयाँ निर्देशिका, जनशक्ति व्यवस्थापन र कडाइका साथ कार्यान्वयनका कारण समयमै नतिजा प्रकाशन सम्भव भएको बताए। उनका अनुसार उत्तरपुस्तिका तीन दिनभित्रै विषयगत शिक्षकमार्फत परीक्षण गराइएको थियो।
त्यस्तै, नेपाल शिक्षक सङ्घका महासचिव ज्ञानेन्द्रबहादुर रावलले सुधार अभियानमा शिक्षकहरूको निरन्तर योगदान रहेको उल्लेख गरे।
परीक्षा नियन्त्रक टुकराज अधिकारीका अनुसार नयाँ निर्देशिकाले पारदर्शिता, गोपनीयता र उत्तरपुस्तिका परीक्षण प्रक्रियालाई व्यवस्थित बनाएको छ। सिसिटिभी निगरानी, मोबाइल निषेध र अनियमितता रोक्ने व्यवस्था लागू गरिएको पनि उनले बताए।
सरकारले आगामी वर्षदेखि एसईई परीक्षा प्रदेशस्तरमा सञ्चालन गर्ने तयारी गरिरहेको छ भने विद्यालय शिक्षा विधेयक पनि संसद्मा अघि बढिरहेको छ।
