काठमाडौं । राष्ट्रिय परीक्षा बोर्डले माध्यमिक शिक्षा परीक्षा (एसईई) २०८१ को नतिजा सार्वजनिक गर्ने अन्तिम तयारी गरिरहेको छ । बोर्ड स्रोतका अनुसार आज साँझसम्म नतिजा सार्वजनिक गर्ने गरी आवश्यक प्राविधिक काम भइरहेको छ ।
परीक्षा बोर्डका सदस्यसचिव जंगबहादुर अर्यालले पनि नतिजा सार्वजनिक गर्ने विषयमा छलफल भइरहेको जानकारी दिए । “हामी अहिले यही विषयमा छलफल गरिरहेका छौं,” उनले भने ।
यस वर्षको एसईई परीक्षा गत चैत १९ गतेदेखि २९ गतेसम्म सञ्चालन भएको थियो । परीक्षा केन्द्रमै उत्तरपुस्तिका परीक्षण गरिएकाले अघिल्ला वर्षको तुलनामा नतिजा छिट्टै सार्वजनिक गर्न सहज भएको बोर्डको भनाइ छ ।
यसपटक एसईई परीक्षाका लागि कुल ५ लाख १२ हजार ४२१ जना विद्यार्थीले आवेदन दिएका थिए । नियमिततर्फ ४ लाख ४१ हजार ५६६ जना तथा ग्रेड वृद्धितर्फ ७० हजार ८५५ जना सहभागी भएका थिए ।
परीक्षार्थीमध्ये २ लाख ५७ हजार ६१३ जना छात्रा, २ लाख ५४ हजार ८०१ जना छात्र तथा अन्य समूहका ७ जना रहेको परीक्षा बोर्डले जनाएको छ ।
