काठमाडौं । नेकपा माओवादी केन्द्रका अध्यक्ष प्रचण्ड शुक्रबार भारत जान लागेका छन् ।
भारतीय जनता पार्टीको औपचारिक निमन्त्रणामा प्रचण्ड दिल्ली जान लागेका हुन् । चिनियाँ कम्युनिष्ट पार्टीको विदेश विभाग प्रमुख लिउ चियानछाओको चारदिने नेपाल भ्रमणबाट स्वदेश फर्किएकै भोलिपल्ट माओवादी केन्द्रका अध्यक्ष प्रचण्ड भारत भ्रमणमा जान लागेका हुन् ।
प्रचण्ड शुक्रवार दिउँसो १ बजे पार्टीका दुई केन्द्रीय नेतासमेत रहेका स्वकीय सचिवद्वय रमेश मल्ल र गंगा दाहाललाई साथमा लिएर दिल्ली भ्रमणमा निस्कन लागेका हुन् ।
भारत जानु अघिल्लो दिन प्रचण्डले स्थायी कमिटि सदस्यहरुको बैठक बोलाएर भ्रमणबारे जानकारी दिएका छन् । बैठकमा प्रचण्डले भारत भ्रमणका विषयमा जानकारी गराएपछि स्थायी कमिटिले भ्रमणको सफलताको शुभकामना व्यक्त गरेको छ ।
