काठमाडौं । गृहमन्त्री रमेश लेखकको राजीनामा माग्दै अवरोधमा उत्रिएका विपक्षी दलहरूको कडा अडानका कारण प्रतिनिधिसभा बैठक सोमबार पुनः स्थगित गरिएको छ। प्रतिपक्षको अवरोधबीच बैठक सुरु हुनासाथ सभामुख देवराज घिमिरेले अधिवेशनलाई आधा घन्टाका लागि स्थगित गर्ने घोषणा गरेका हुन्।
भिजिट भिसा प्रकरणमा उत्पन्न विवादपछि विपक्षी दलहरूले गृहमन्त्रीको नैतिक जिम्मेवारी उठाउँदै पदत्यागको माग गरिरहेका छन्। सत्तारूढ गठबन्धनले भने छानबिन प्रक्रिया अख्तियारमा जारी रहेको जनाउँदै संसदीय समिति गठन नगर्ने अडान लिएको छ, जसले गतिरोध झनै बलियो बनाएको छ।
यसबीच, बैठक सुचारु गराउने प्रयासस्वरूप सभामुख घिमिरेको पहलमा सत्ता र प्रतिपक्षी दलबीच लगातार संवाद भएको भए पनि कुनै निष्कर्षमा पुग्न सकेको छैन। स्रोतका अनुसार, आजै नेपाली कांग्रेसका वरिष्ठ नेता पूर्णबहादुर खड्का र प्रमुख सचेतक श्यामकुमार घिमिरेले रास्वपाका प्रमुख सचेतक सन्तोष परियारसँग छुट्टै वार्ता गरेका थिए। तर, कांग्रेसले अख्तियारमा चलिरहेको छानबिन पर्याप्त हुने धारणा राखेपछि रास्वपा सहमत हुन तयार देखिएन।
माओवादी केन्द्रले भने समस्या समाधानका लागि मध्यमार्गी प्रस्तावको पक्षमा उभिनुपर्ने सुझाव दिएको छ। तर, प्रतिपक्षी दल खासगरी रास्वपाले राजीनामा वा संसदीय छानबिन समिति गठन नभएसम्म संसद् चल्न नसक्ने स्पष्ट अडान दोहोर्याउँदै आएको छ । संसदीय प्रक्रिया लगातार अवरुद्ध हुँदै जाँदा बजेट सत्र प्रभावित हुने चिन्ता बढ्दै गएको छ। सभामुखले बैठक पुनः सञ्चालनका लागि समय तोके पनि, राजनीतिक सहमति विना संसद् सुचारु हुने सम्भावना न्यून देखिएको छ।
