दमौली । नेपाली कांग्रेसका महामन्त्री गगनकुमार थापाले पार्टीलाई सुदृढ बनाउन सबै एकजुट हुनुपर्ने आह्वान गरेका छन्। नेपाली कांग्रेस प्रतिनिधिसभा क्षेत्र नम्बर १ तनहुँद्वारा दमौलीमा बुधबार आयोजित दोस्रो क्षेत्रीय सम्मेलनलाई सम्बोधन गर्दै उनले पार्टीलाई बलियो बनाउन सबै तहका कार्यकर्ताहरू एकताबद्ध भएर लाग्नुपर्ने बताए।
“हामीले पार्टीलाई जनताको विश्वास जित्ने गरी अघि बढाउनुपर्छ,” महामन्त्री थापाले भने, “गुट-उपगुटको अन्त्य गरी पार्टीलाई एकताबद्ध बनाउनु आजको आवश्यकता हो।”
उनले कांग्रेसलाई जनताको भरोसायोग्य पार्टी बनाउन कार्यकर्ताहरूले आफ्नो भूमिका इमान्दारीपूर्वक निर्वाह गर्नुपर्नेमा जोड दिए। “हामीले जनताको आवाज सुन्नुपर्छ र उनीहरूका समस्या समाधान गर्न लाग्नुपर्छ,” उनले थपे।
सम्मेलनमा सहभागी कार्यकर्ताहरूले महामन्त्री थापाको आह्वानलाई समर्थन गर्दै पार्टीलाई बलियो बनाउन एकजुट भएर लाग्ने प्रतिबद्धता व्यक्त गरेका थिए।
