काठमाडौं । पछिल्लो समय नेपालमा चिनियाँ हस्तक्षेप खुलमखुला बढेको छ । त्यसमा पनि वर्तमान राजदूत होउ यान्छी त नेकपा नेताको घरघरमै पुग्ने गरेकी छन् ।
अहिलेसम्म प्रधानमन्त्री केपी ओलीको कुर्सी जोगाउन उनले निकै ठूलो भूमिका खेलिरहेकी छन् । नेपाललाई आफू अनुकूल निर्णय गराउन चाहेको चीनले सत्तारुढ नेकपा विभाजन हुन नदिन बेलाबेलामा दबाब दिँदै आएको छ ।
त्यसकै निरन्तरताका लागि चिनियाँ राजदूत होउ यान्छी सोमबार बिहान नेकपा कार्यकारी अध्यक्ष पुष्पकमल दाहाल प्रचण्ड निवास पुगेकी छन् । प्रचण्ड र राजदूत यान्छीको भेटबारे विस्तृत जानकारी गराइएको छैन । तर, उनी नेकपामा देखिएको विवाद मिलाउनकै लागि खुमलटार पुगेको स्रोतले बताएको छ ।
नेकपाका कार्यकारी अध्यक्ष प्रचण्डले प्रधानमन्त्री केपी ओलीलाई लेखेको पत्रका कारण पार्टीमा अहिले बबन्डर मच्चिएको छ । प्रधानमन्त्री ओलीले प्रचण्डलाई आफूमाथि लगाइएको आरोप फिर्ता लिन आग्रह गर्दै आएका छन् । तर, प्रचण्ड टसमस नभएपछि चिनियाँ राजदूत यान्छीमार्फत बालुवाटारले दबाब दिन थालेको विश्लेषण गर्न थालिएको छ ।
नेकपाको सचिवालय बैठक मंसिर १३ गते बस्दैछ । तर, त्यसैदिन चिनियाँ रक्षामन्त्री वेई फेङ आउने भएकाले स्थगित हुने प्रबल सम्भावना छ ।
