काठमाडौँ । सोमबारदेखि देशभरका ७७ जिल्लामा सञ्चालन हुने कक्षा १२ को परीक्षामा ४ लाख १८ हजार ८ जना परीक्षार्थी सहभागी हुने भएका छन्।
राष्ट्रिय परीक्षा बोर्डका अनुसार नियमिततर्फ ३ लाख ३२ हजार १ सय ७८ र आंशिकतर्फ ८५ हजार ८ सय ३० जना विद्यार्थी सहभागी हुँदैछन्।
२०७९ यताका विद्यार्थी आंशिक परीक्षामा सहभागी हुनेछन्। जापानस्थित एभरेस्ट स्कुलबाट ३६ जना विद्यार्थीले पनि परीक्षा दिने भएका छन्।
गत वर्षको तुलनामा परीक्षार्थी संख्या घटेसँगै परीक्षा केन्द्र संख्या पनि कम गरिएको परीक्षा नियन्त्रक कृष्णप्रसाद शर्माले जानकारी दिए। यस वर्ष देशभर १ हजार ४ सय २१ परीक्षा केन्द्र तोकिएका छन्। गत वर्ष ५ लाख ११ हजार ५ सय २५ परीक्षार्थी सहभागी भएका थिए।
परीक्षा सामग्री, उत्तरपुस्तिकासहित, सबै केन्द्रमा पठाइसकिएको छ। प्रश्नपत्र भने कोभिड–१९ महामारीयता अनलाइनमार्फत पठाउने व्यवस्था जारी राखिएको छ। परीक्षा सुरु हुने दिन नै केन्द्राध्यक्ष र सुरक्षाकर्मीको उपस्थितिमा प्रश्नपत्र प्रिन्ट गरी वितरण गरिनेछ।
परीक्षा बिहान ८ बजेदेखि ११ बजेसम्म सञ्चालन हुनेछ। परीक्षार्थीले परीक्षा सुरु हुनुभन्दा कम्तीमा आधा घण्टा अगाडि केन्द्रमा पुग्नुपर्नेछ। परीक्षा सुरु भएको १५ मिनेटपछि आउनेलाई सहभागी गराइने छैन।
परीक्षार्थीलाई केन्द्र परिवर्तन गर्न अनुमति दिइएको छैन। मोबाइल फोन, स्मार्ट घडी लगायतका इलेक्ट्रोनिक उपकरण लैजान निषेध गरिएको छ।
नियमिततर्फ वैशाख १४ गते अनिवार्य अंग्रेजी विषयबाट परीक्षा सुरु हुनेछ। त्यसपछि १५ गते नेपाली, १७ गते सामाजिक अध्ययन तथा जीवनोपयोगी शिक्षा र त्यसपछि ऐच्छिक विषयहरूको परीक्षा हुनेछ।
कक्षा १२ को परीक्षा वैशाख २७ गतेसम्म सञ्चालन हुनेछ। नतिजा सामान्यतया तीन महिनाभित्र प्रकाशित हुने गरेको बोर्डले जनाएको छ।
यसैबीच, कक्षा १० (एसईई) को नतिजा वैशाख मसान्तसम्म सार्वजनिक गर्ने लक्ष्य राखिएको छ।
