काठमाडौँ । प्रतिपक्षी दल श्रम शक्ति पार्टीका अध्यक्ष हर्कराज राईले नागरिकले सरकारबाटै असुरक्षाको अनुभूति गर्न थालेको गम्भीर टिप्पणी गरेका छन् ।
मङ्गलबार संसद्मा आगामी आर्थिक वर्षको नीति तथा कार्यक्रममाथिको छलफलमा सहभागी हुँदै उनले सरकारको कार्यशैलीमाथि प्रश्न उठाएका हुन् ।
अध्यक्ष राईले प्रधानमन्त्री बालेन्द्र साह प्रति लक्षित गर्दै संसद् र जनप्रतिनिधिप्रति सरकार प्रमुखको जवाफदेहिता कमजोर भएको आरोप लगाए । उनले प्रधानमन्त्रीले सांसदहरूले उठाएका प्रश्नको जवाफ दिनुपर्ने कि नपर्ने भन्ने प्रश्नसमेत उठाए ।
उनका अनुसार संसद्मा उपस्थित भएर पनि प्रश्नहरूको उत्तर नदिनु जनताको आवाज बेवास्ता गर्नु सरह हो । उनले यस्तो अवस्थाले सरकारको क्षमता र जवाफदेहितामाथि गम्भीर प्रश्न उठाएको दाबी गरे ।
राईले भने, “यो सरकारको प्रधानमन्त्री छ कि छैन भन्ने प्रश्न उठ्न थालेको छ। यदि छ भने संसद्लाई सम्बोधन गर्नुपर्ने कि नपर्ने? सांसदहरूले उठाएका प्रश्नको जवाफ दिनुपर्ने कि नपर्ने? संसद्मा आएर पनि उत्तर नदिनु भनेको जनताको प्रश्नलाई बेवास्ता गर्नु हो। जनताको प्रश्नको जवाफ दिन नसक्नु अयोग्यता र असक्षमताको संकेत हो।”
उनले सरकारप्रति असन्तुष्टि जनाउँदै नागरिकले अहिले राज्यबाटै असुरक्षित महसुस गरिरहेको उल्लेख गरे । साथै, जनताले सरकारसँग डराएर बाँच्नुपर्ने अवस्था लोकतन्त्रको मर्म विपरीत भएको उनको तर्क थियो ।
अध्यक्ष राईले सरकारलाई नागरिकको जीउधन सुरक्षा र सीमा सुरक्षामा असफल भएको आरोप लगाउँदै यस्तो सरकारलाई सफल भन्न नसकिने पनि बताए ।
