काठमाडौँ।प्रधानमन्त्री वालेन्द्र शाहको आह्वानमा आज संवैधानिक परिषद्को बैठक बस्दैछ । बैठक अपराह्न ५ बजे सिंहदरबारमा बस्ने गरी बोलाइएको छ ।
संवैधानिक परिषद्का अध्यक्षसमेत रहेका प्रधानमन्त्री शाहको निर्देशनमा बोलाइएको बैठकमा सर्वोच्च अदालतको नयाँ प्रधानन्यायाधीश नियुक्तिका लागि सिफारिसबारे छलफल हुने बताइएको छ ।
बैठकमा सभामुख डोलप्रसाद अर्याल, राष्ट्रिय सभाका अध्यक्ष नारायणप्रसाद दाहाल, कानुन, न्याय तथा संसदीय मामिलामन्त्री सोविता गौतम, प्रतिनिधिसभाका विपक्षी दलका नेता भीमराज आङ्देम्बे तथा प्रतिनिधिसभाकी उपसभामुख रुवी कुमारी सहभागी हुनेछन् ।
राष्ट्रपति रामचन्द्र पौडेलले संवैधानिक परिषद्सम्बन्धी अध्यादेश मंगलबार जारी गरेलगत्तै परिषद्को बैठक बोलाइएको हो ।
अध्यादेश जारी भएसँगै ६ सदस्यीय संवैधानिक परिषद्को बैठक बस्नका लागि गणपूरक सङ्ख्या चार कायम गरिएको छ । यस व्यवस्थाअनुसार परिषद्का तीन सदस्यको बहुमतबाट प्रधानमन्त्री शाहले निर्णय गराउन सक्ने अवस्था बनेको छ ।
राष्ट्रपति पौडेलले सरकारले अघिल्लो साता सिफारिस गरेको यही अध्यादेश पुनर्विचारका लागि फिर्ता पठाएका थिए । तर सरकारले कुनै संशोधन नगरी सोमबार पुनः सिफारिस गरेपछि राष्ट्रपतिले अध्यादेश जारी गरेका हुन् ।
