काठमाडौँ । सम्पत्ति शुद्धीकरण (मनी लाउन्डरिङ) मुद्दामा अनुसन्धानको क्रममा हिरासतमा रहेका व्यवसायीद्वय सुलभ अग्रवाल र दीपक भट्टलाई थप १२ दिन हिरासतमा राख्न विशेष अदालत काठमाडौँले अनुमति दिएको छ। बुधबार विशेष अदालतका न्यायाधीशहरू हेमन्त रावल, डिल्लीरत्न श्रेष्ठ र विदुर कोइरालाको इजलासले अनुसन्धान प्रक्रिया अझै पूर्ण नभएको भन्दै म्याद थपको आदेश जारी गरेको हो।
अदालतको आदेशअनुसार शङ्कर ग्रुपका सञ्चालक सुलभ अग्रवालको हकमा यो छैटौँ पटक म्याद थप गरिएको हो भने व्यवसायी दीपक भट्टको हकमा पाँचौँ पटक हिरासत अवधि लम्ब्याइएको हो। नयाँ म्याद २०८३ वैशाख २३ गतेदेखि लागू हुने गरी थप गरिएको अदालतले जनाएको छ।
सम्पत्ति शुद्धीकरण अनुसन्धान विभागले दुवै व्यवसायीविरुद्ध वित्तीय कारोबार र सम्पत्ति स्रोतबारे गहिरो अनुसन्धान गरिरहेको छ। अनुसन्धान अधिकारीहरूले अभियोजनका लागि आवश्यक प्रतिवेदन तयारीको काम बाँकी रहेको भन्दै थप समय माग गरेका थिए। विभागका अनुसार सरकारी वकिलसँगको राय प्रतिवेदनपछि मात्र अन्तिम अभियोजन प्रक्रिया अघि बढाइनेछ।
हालै संशोधन गरिएको सम्पत्ति शुद्धीकरण निवारण ऐन, २०६४ अनुसार अनुसन्धान र मुद्दा दायर गर्ने प्रक्रियामा केही परिवर्तन आएको छ। सोही कानुनी ढाँचाअनुसार संयुक्त अनुसन्धान टोलीले छानबिन अघि बढाइरहेको बताइएको छ।
विशेष अदालतको पछिल्लो आदेशसँगै अग्रवाल र भट्टको हिरासत अवधि पुनः लम्बिएको छ। अनुसन्धान अझै जारी रहेकाले आगामी दिनमा मुद्दाको दिशा अभियोजनतर्फ अघि बढ्ने वा थप प्रमाण संकलनमा केन्द्रित रहने भन्ने स्पष्ट हुने अपेक्षा गरिएको छ।
