काठमाडौं । सरकारले पहिलो पटक खुला प्रतिस्पर्धाबाट राजदूत नियुक्त गर्ने तयारी गरेको छ। परराष्ट्र मन्त्रालयले राजदूत छनोट प्रक्रियामा पारदर्शिता र योग्यता सुनिश्चित गर्न विज्ञापनमार्फत पदपूर्ति गर्ने योजना अघि बढाएको हो।
परराष्ट्र मन्त्रालयका अनुसार ‘राजदूत नियुक्तिसम्बन्धी निर्देशिका, २०७५’ अनुसार अहिलेसम्म ५० प्रतिशत करियर डिप्लोम्याट र ५० प्रतिशत राजनीतिक कोटाबाट नियुक्ति हुँदै आएको थियो। तर यस पटक केही पदमा खुला प्रतिस्पर्धा लागू गर्ने तयारी गरिएको छ।
परराष्ट्रमन्त्री शिशिर खनालले मन्त्रालयका उच्च अधिकारीसँगको छलफलमा खुला प्रतिस्पर्धाबाट राजदूत छनोट गर्ने योजना अघि बढाइएको बताएका छन्। विज्ञापन आगामी हप्ताभित्र आह्वान हुन सक्ने अनुमान गरिएको छ।
मन्त्रालय स्रोतका अनुसार उम्मेदवारको उमेर, अनुभव, शैक्षिक योग्यता, अनुसन्धान तथा प्रकाशनजस्ता मापदण्डलाई आधार बनाइनेछ। साथै, करियर डिप्लोम्याटबाट पनि केही पदमा नियुक्ति हुने व्यवस्था रहने बताइएको छ।
सरकारले केही समयअघि विभिन्न देशमा रहेका राजदूत फिर्ता बोलाएपछि हाल भारत, चीन, अमेरिका, बेलायतसहित १७ दूतावास रिक्त छन्। आगामी महिनासम्म थप दूतावास रिक्त हुने भएकाले एकै पटक ठूलो संख्यामा नियुक्ति हुने सम्भावना छ।
सरकारले खुला प्रतिस्पर्धाबाट नियुक्ति गर्दा योग्य र सक्षम व्यक्तिको छनोट हुने दाबी गरेको छ। तर कूटनीतिक क्षेत्रका केही पूर्वअधिकारीले यसले मात्र पूर्ण ग्यारेन्टी नदिने टिप्पणी गरेका छन्।
