काठमाडौं । नेकपा एमालेभित्र नेतृत्व, विधान र पूर्वराष्ट्रपति विद्या भण्डारीको सम्भावित सक्रियता बारे बहस तीव्र हुँदै गएको छ। पार्टी महासचिव शंकर पोखरेलले पछिल्लो दिनहरूमा खुलेर विभिन्न विषयमा धारणा राखेका छन्, जसले एमालेभित्र चलिरहेको असन्तुष्टि, घोचपेच र आन्तरिक बहसलाई थप उजागर गरेको छ।
पोखरेलले विधान, पार्टी संरचना, नेतृत्व र विद्या भण्डारीको सक्रिय राजनीतिमा फर्किने सम्भावनालाई लिएर उठेका विषयमा स्पष्ट र प्रत्यक्ष टिप्पणी गरेका छन्। उनले स्पष्ट पारे कि विद्या भण्डारीको पार्टी सदस्यता नवीकरण पुरानै हो र अहिले त्यो विषय पार्टीको औपचारिक एजेन्डा होइन। “न उहाँले राजनीति फर्किन्छु भन्नुभएको छ, न पार्टीले छलफल गरेको छ,” पोखरेलले भने।
महासचिव पोखरेलले पार्टी विधानबाट हटाइएको ‘दुई कार्यकाल’ सम्बन्धी प्रावधानबारे उठिरहेका आलोचनाप्रति प्रतिप्रश्न गर्दै भने, “जसले त्यसबेला सर्वसम्मत समर्थन गरेर हटाएको, अहिले थाहा थिएन भन्न मिल्दैन।” उनले यस्तो बहसलाई अतिरञ्जनात्मक भनेका छन्। पार्टी नेतृत्वको बहस अहिलेको विधान महाधिवेशनमा हुने नभई राष्ट्रिय महाधिवेशनमा मात्र हुने स्पष्ट पार्दै पोखरेलले अहिले अनावश्यक चर्चा गरेर पार्टीलाई ‘बरालिन’ नदिने आग्रह गरे। “नीति र थिति अहिले, नेतृत्वको बहस पछि,” उनको भनाइ थियो।
सरकारमा सहभागी एमालेका मन्त्रीहरूबारे हाल हेरफेरको कुनै योजना नभएको स्पष्ट पार्दै पोखरेलले भने, “हेरफेरको चर्चा मिडियामा गर्नु मूर्खता हो।” पार्टीभित्र र गठबन्धनमा मन्त्रालयको अदल–बदल सहमतिअनुसार एक वर्षपछि मात्र हुने जनाए।
एमालेको आगामी विधान महाधिवेशन नजिकिँदै गर्दा पार्टीभित्र गहिरो विमर्श, रणनीतिक चाख र नेतृत्वको सम्भावित प्रतिस्पर्धा सतहमा आउँदैछ। महासचिव पोखरेलको स्पष्ट भाषणले पार्टीभित्रको बहसलाई नयाँ मोड दिएको छ, जहाँ घोचपेच र गम्भीर राजनीतिक पृष्ठभूमि दुवै एकसाथ देखिन्छन्।
