काठमाडौं । पूर्वप्रधानमन्त्री डा.बाबुराम भट्टराई नयाँ दिल्ली प्रस्थान गरेका छन् । उपचारको सिलसिलामा उनी आइतबार बिहान त्यसतर्फ प्रस्थान गरेका हुन् ।
बाबुरामसँगै उनकी श्रीमती हिसिला यमी र सञ्चार सल्लाहकार विश्वदीप पाण्डे पनि दिल्ली गएका छन् । जनता समाजवादी पार्टीका संघीय परिषद् अध्यक्ष भट्टराई नेपाल वायुसेवाको जहाजबाट भारतको नयाँ दिल्ली उडेका हुन् ।
पेटमा समस्या देखिएपछि लामो समयदेखि काठमाडौंको निदान अस्पतालमा उनको स्वास्थ्य परीक्षण तथा उपचार भइरहेको थियो ।
चिकित्सकहरुले न्युरो–इन्डोक्राइनको ट्युमर भएको आशंका गरी सल्लाह र सिफारिश गरेकाले उनी दिल्लीमा त्यसको उपचारका लागि जान लागेका हुन् । दिल्लीमा उनको उपचार इन्स्टिच्युट अफ लिभर एण्ड बिलिअरी साइन्सेसमा हुनेछ । उपचारका लागि दिल्लीमा रहँदा उनी नेपालको दूतावासमा बस्नेछन् ।
