काठमाडौं । भारतीय क्रिकेटका महान् खेलाडी महेन्द्रसिंह धोनीको इन्डियन प्रिमियर लिग (आईपीएल) मा खेलाडीका रूपमा १९ वर्षे यात्रा अन्त्य भएको छ । चेन्नई सुपर किंग्सले उनलाई सन् २०२७ को संस्करणका लागि मेन्टर नियुक्त गर्ने मंगलबार घोषणा गरेको छ ।
४५ वर्षीय धोनीले सन् २००८ देखि चेन्नई सुपर किंग्सको प्रतिनिधित्व गर्दै पाँच पटक आईपीएल उपाधि जितेका थिए । उनको कप्तानीमा चेन्नईले सन् २०१०, २०११, २०१८, २०२१ र २०२३ मा उपाधि उचालेको थियो । उनले आईपीएल करियरमा कुल ५ हजार ४३९ रन बनाएका छन् ।
धोनीले चेन्नईका लागि आईपीएलका १७ सिजन खेलेका थिए । सन् २०२६ को संस्करणमा भने चोटका कारण उनले एक खेल पनि खेल्न पाएनन् । अन्तर्राष्ट्रिय क्रिकेटबाट सन् २०२० मा संन्यास लिएपछि उनले आईपीएलमा मात्रै आफ्नो खेलजीवनलाई निरन्तरता दिँदै आएका थिए ।
चेन्नई सुपर किंग्सका मालिक एन श्रीनिवासनले धोनी सधैँ टोलीको पहिचान र परिवारको अभिन्न हिस्सा रहने बताउनुभएको छ । सन् २०२७ को आईपीएल संस्करणमा धोनी मुख्य प्रशिक्षक जाहिर खानसहितको नयाँ प्रशिक्षक टोलीसँग रहेर सल्लाहकारको भूमिका निर्वाह गर्नेछन् ।
खेलाडीका रूपमा चेन्नईलाई पाँच पटक च्याम्पियन बनाएका धोनी अब नयाँ भूमिकामा टोलीको भविष्य निर्माणमा जोडिनेछन् ।




