अमेरिकी राष्ट्रपति डोनाल्ड ट्रम्पले सन् २०२८ को राष्ट्रपतीय निर्वाचनमा उपराष्ट्रपति जे.डी. भान्सलाई समर्थन गर्ने विषयमा तत्काल निर्णय गर्न अस्वीकार गर्दै त्यसका लागि अहिले ‘धेरै चाँडो’ भएको बताउनुभएको छ ।
आयरल्यान्डको श्याननबाट एयर फोर्स वनमा चढ्नुअघि पत्रकारहरूसँग कुरा गर्दै उहाँले भान्सले उत्कृष्ट काम गरिरहेको बताउँदै रिपब्लिकन पार्टीसँग नेतृत्वका लागि धेरै योग्य व्यक्ति रहेको उल्लेख गर्नुभयो । “मलाई लाग्छ, उहाँ उत्कृष्ट हुनुहुन्छ । हामीसँग धेरै अद्भुत व्यक्ति छन् । हाम्रो ‘बेन्च’ निकै बलियो छ”, उहाँले भन्नुभयो ।
यसअघि अगस्टमा द वासिङ्टन पोस्टले दाताहरूसँगको निजी बैठकमा राष्ट्रपति ट्रम्पले सम्भावित उत्तराधिकारीका रूपमा भान्सको पक्षमा सकारात्मक धारणा राख्दै ‘हामीले जेडीलाई चयन गर्न आवश्यक छ’ भन्नुभएको समाचार प्रकाशित गरेको थियो । यद्यपि, उहाँले विदेशमन्त्री मार्को रुबियोलाई समेत सम्भावित उत्तराधिकारीका रूपमा विचार गर्दै आउनुभएको बताइएको छ ।
ट्रम्पका सल्लाहकारहरूका अनुसार उहाँले उत्तराधिकारीबारे अन्तिम निर्णय गरिसक्नुभएको छैन । आगामी कङ्ग्रेसनल मध्यावधि निर्वाचनको परिणामले सन् २०२८ को राष्ट्रपतीय दौडमा प्रभाव पार्न सक्ने भएकाले अहिलेको अनुमान अपरिपक्व हुने उनीहरूको भनाइ छ ।
यसैबीच, रिपब्लिकन पार्टीका दाता तथा कार्यकर्ताहरू भान्स र रुबियोमध्ये सम्भावित उम्मेदवारका पक्षमा विभाजित हुन थालेका छन् । भान्सले पनि आगामी नोभेम्बरको मध्यावधि निर्वाचनपछि मात्र आफ्नो सन् २०२८ को राजनीतिक योजनाबारे निर्णय गर्ने सङ्केत गर्नुभएको छ । रुबियोले भने राष्ट्रपतीय आकाङ्क्षाबारे अहिलेसम्म प्रत्यक्ष टिप्पणी गर्नुभएको छैन ।
