काठमाडौं । संघीय संसद प्रतिनिधि सभा कानून, न्याय तथा संसदीय समितिले काठमाडौं उपत्यकाभित्रका सुकुम्बासी बस्तीको अनुगमन गर्ने निर्णय गरेको छ ।
सोमबार सिंहदरबारमा बसेको समितिको बैठकले सरकारले हालै हटाएको सुकुम्बासी बस्तीका प्रभावित नागरिकको अवस्थाबारे अध्ययन र पीडाको सुनुवाइ गर्न एक हप्ताभित्र अनुगमनमा जाने निर्णय गरेको हो ।
समितिकी सभापति समिक्षा बास्कोटाका अनुसार काठमाडौं उपत्यकाभित्रका सुकुम्बासी बस्तीको वास्तविक अवस्थाबारे जानकारी लिन यही हप्ताभित्र अनुगमन गरिनेछ । उनले समिति अझ प्रभावकारी बनाउन आवश्यकताअनुसार उपसमिति गठन गरेर अघि बढ्ने तयारी रहेको पनि बताइन् ।
बास्कोटाले बजेट अभावका कारण तत्काल उपत्यकाबाहिर अनुगमन गर्न नसकिने भए पनि उपत्यकाभित्रको अध्ययनलाई प्राथमिकता दिइने स्पष्ट पारिन् । उनले समितिका सदस्यहरूबीच सहकार्य गर्दै संसदीय कामलाई प्रभावकारी बनाउने अपेक्षा व्यक्त गरिन् ।
