मोरङ । विराटनगर महानगरपालिका प्रमुखका उम्मेदवार नेपाली काँग्रेसका नागेश कोइरालाले पालिकालाई भ्रष्टाचार शून्य गराउने बताएका छन् ।
उनले विराटनगर–१३ मा आज गठबन्धन दलका महानगरपालिकाका प्रमुख, उपप्रमुखका उम्मेदवारसँग आयोजित पत्रकार सम्मेलनमा महानगरलाई भ्रष्टाचार शून्य गराउँदै विकासमा जोड दिइने उल्लेख गरे ।
कोइरालाले महानगरमा गुणस्तरीय सामुदायिक विद्यालय, हराभरा, सफा सहर, जनताको पालिकामा सहज पहुँच तथा कर्मचारी भर्ती केन्द्र नबनाइने विषयलाई प्राथमिकताकासाथ लागू गर्ने जानकारी दिए।
यसैगरी जसपाबाट उपप्रमुखका उम्मेदवार अमरेन्द्र यादवले समावेशी, बाढीमुक्त सहर, स्वच्छ खानेपानी, सहज स्वास्थ्य उपचार र सुकुम्वासी समस्यामुक्त, दोस्रो ठुलो सहर निर्माणमा ध्यान केन्द्रित गर्ने प्रतिबद्धता व्यक्त गरे ।
उनले प्रदेशको स्थायी राजधानी रहेको यो सहरमा विराट राजा दरबारको संरक्षणलगायत अन्य आकर्षण केन्द्रको निर्माण गरी पर्यटक मैत्री बनाउने विश्वास दिलाए ।
वडा नं १३ का जसपाका अध्यक्षका उम्मेदवार बालदेव यादवले सबैको सहयोगमा जनताको आवश्यकतालाई ध्यानमा राखी कार्य गर्ने प्रतिबद्धता व्यक्त गरे ।
