काठमाडौँ । निर्वाचन आयोगले सोमबार अपराह्न ५ बजेसम्म उम्मेदवारी दिन लाइन बसेकाहरूको मनोनयन दर्ता गर्ने भएको छ ।
सोमबार धेरै मनोनयन दर्ता हुने अनुमान गर्दै आयोगले अपराह्न ५ बजेसम्म मुख्य निर्वाचन अधिकृतको कार्यालय परिसरमा प्रवेश गर्नेलाई मनोनयन दर्ता गर्न दिने भएको हो ।
निर्वाचन आयुक्त ईश्वरीप्रसाद पौडेलका अनुसार मनोनयन दर्ता गर्न चाहनेले सोमबार अपराह्न ५ बजेसम्म सम्बन्धित जिल्लाको निर्वाचन अधिकृतको कार्यालयमा प्रवेश गरिसक्नुपर्नेछ ।
निर्वाचन आयोगले ३० वैशाखमा हुने स्थानीय तह निर्वाचनमा ३ लाख भन्दा बडी मनोनयन दर्ता हुने अनुमान गरेको छ । तर सोमबार दिउँसो १२ बजेसम्म मेयर, उपमेयर, अध्यक्ष, उपाध्यक्ष, वडाध्यक्ष र वडा सदस्यमा गरी साढे १६ हजार जनाको मात्र उम्मेदवारी दर्ता भएको छ ।
सोमबार दिउँसो २ बजेदेखि मनोनयन दर्ताको चाप बढ्न सक्ने आयोगको अनुमान छ । त्यसैले अपराह्न पाँच बजेसम्म लाइनमा बसेका सबैको मनोनयन दर्ता गर्न लागेको हो ।
आयोगले सोमबार साँझ अबेरसम्म पनि लाइनमा बसेकाहरूको मनोनयन दर्ता भइरहने आयोगको अनुमान छ ।
