काठमाडौं । त्रिपुरेश्वरमा बसमा आगलागी भएको घटनाको छानबिन गर्न काठमाडौं उपत्यका प्रहरी कार्यालय रानीपोखरीले समिति गठन गरेको छ।
एसएसपी रमेश बस्नेतको नेतृत्वमा छानबिन समिति गठन गरिएको रानीपोखरीका एआईजी सुशील सिंह राठौरले जानकारी दिए। समितिलाई घटनाको छानबिन गरी प्रतिवेदन बुझाउन पाँच दिनको समय दिइएको छ।
रिद्धिसिद्धि यातायातको बा ५ ख ४२७४ नम्बरको बसमा आगलागी हुँदा चालक काभ्रेका २५ वर्षीय दावा लामा गम्भीर घाइते भएका थिए। प्रहरीले उनको उद्धार गरी उपचारका लागि कीर्तिपुरस्थित बर्न अस्पताल पठाएको थियो। उपचारमा संलग्न चिकित्सकका अनुसार उनको अवस्था चिन्ताजनक छ।
बसमा आगलागी हुनुअघि चालक र ट्राफिक प्रहरीबीच विवाद भएको देखिन्छ। सार्वजनिक भएको भिडियोमा ट्राफिक प्रहरीले चालकलाई ट्राफिक नियम उल्लङ्घन गरेको आरोपमा जरिवानाको चिट काट्न खोजेको देखिन्छ। चालकले भने आफूले कुनै गल्ती नगरेको भन्दै जरिवाना तिर्न अस्वीकार गरेको सुनिन्छ।
‘मलाई बिना कसुर फाइन हान्न खोज्दै हुनुहुन्छ,’ चालकले भनेको भिडियोमा सुनिन्छ।चालक ड्राइभिङ सिटमै रहेका बेला सडकमा रहेका ट्राफिक प्रहरीसँग विवाद भइरहेको भिडियोमा सशस्त्र प्रहरीको पोसाकमा रहेका तथा सादा पोसाकका व्यक्तिहरू पनि देखिन्छन्। उनीहरूले बस सडकको बीच भागमा रोकिँदा यातायात आवागमन प्रभावित भएको भन्दै बसलाई साइड लगाउन आग्रह गरेको सुनिन्छ।
त्यस क्रममा चालकले आफूले ट्राफिक प्रहरीलाई सम्मान गरेको र माफीसमेत मागेको तर आफूलाई जबर्जस्ती जरिवाना तिराउन खोजिएको गुनासो गरेका छन्।
जरिवाना तिर्नैपर्ने ट्राफिक प्रहरीको भनाइ र आफूले जरिवाना नतिर्ने चालकको अडानका बीच विवाद थप चर्किएको देखिन्छ। त्यसपछि चालक थप आक्रोशित हुँदै ‘हामी काम गर्ने मान्छे हो । म मर्न तयार छु’ भनेको भिडियोमा सुनिन्छ।
आफ्नो गल्ती नभएको तर पनि आफूले माफी मागेको दोहोर्याउँदै उनले भनेका छन्, ‘मैले यति धेरै रेस्पेक्ट गर्दागर्दै यिनीहरूले लापरवाही गर्ने ! जे गर्न सक्छ गर।’
त्यसको केही समयपछि बसको पछिल्लो भागबाट आगो दन्किएको देखिन्छ। प्रहरीले चालकले नै बसमा आगो लगाएको हुनसक्ने आशंका गरेको छ।
यद्यपि, बसमा आगलागी कसरी भयो भन्ने विषयमा छानबिन भइरहेको र समितिको प्रतिवेदनपछि मात्रै घटनाको वास्तविक कारणबारे निष्कर्षमा पुग्न सकिने प्रहरीले जनाएको छ।
