काठमाडौं । आसन्न प्रतिनिधिसभा सदस्य निर्वाचनको तयारीलाई थप प्रभावकारी बनाउन निर्वाचन आयोगले पूर्वप्रमुख निर्वाचन आयुक्त र पूर्व आयुक्तहरूसँग अनुभव आदानप्रदान गर्ने भएको छ। आयोगका अनुसार विगतका निर्वाचन अनुभव, सुरक्षाको व्यवस्थापन, दलहरूसँगको समन्वय र प्राविधिक तयारीका विषयमा पूर्व पदाधिकारीहरूसँग विस्तृत छलफल गर्न लागिएको हो।
यसअघि आयोगले राजनीतिक दलहरूसँग पनि परामर्श गरिसकेको छ। सो अवसरमा आयोगले सबै दल र सरोकारवालालाई मतदाता नामावलीमा नाम छुटेकालाई दर्ता गराउन जनस्तरमा सहयोग गर्न आह्वान गरेको थियो। कार्यवाहक प्रमुख निर्वाचन आयुक्त रामप्रसाद भण्डारीका अनुसार निर्वाचन तयारीको करिब ६० प्रतिशत काम पूरा भइसकेको छ भने बाँकी काम तीव्र गतिमा अगाडि बढिरहेको छ।
उनका अनुसार आयोगले आवश्यक सामग्रीहरूको विस्तृत सूची तयार गरी खरिद प्रक्रिया सुरु गरिसकेको छ। फागुन २१ गतेका लागि तय गरिएको प्रतिनिधिसभा सदस्य निर्वाचनका लागि ७९ प्रकारका सामग्री आवश्यक पर्ने बताइएको छ। तीमध्ये १४ प्रकारका वस्तु खरिद प्रक्रिया अन्तिम चरणमा पुगेका छन्।
निर्वाचनका लागि मतपेटिका, मार्कर पेन, पित्तलको स्वस्तिक छाप, स्ट्याम्प प्याड, मसी, लाहा छाप, मतदान कक्षका छेकवारा, फारम, कार्ड, थैला, डटपेन, कागज, पिन, धागो, स्टेपलर, गम, मैनबत्ती, ब्लेड, कैँचीलगायत सामग्री आवश्यक पर्ने आयोगले जनाएको छ। आयोगले निर्वाचन तयारीका सबै पक्ष — कानुनी, व्यवस्थापकीय र प्राविधिक — सुदृढ बनाउन निरन्तर छलफल र समन्वय जारी राखेको स्पष्ट पारेको छ।
