काठमाडौं । मधेश प्रदेश सरकारका पूर्वराज्यमन्त्री तथा जनता समाजवादी पार्टी (जसपा) का प्रदेश सांसद सरोज कुमार सिंह कुशवाहा अख्तियारको फन्दामा परेका छन्। अख्तियार दुरुपयोग अनुसन्धान आयोगले उनलाई काठमाडौंको अनामनगरबाट पक्राउ गरेको हो।
सरोज सिंहको महोत्तरी–४(ख) स्थित घरमा जेठ १२ गते अख्तियारले छापा मारेको थियो। त्यस क्रममा उनका स्वकीय सचिव विनोदकुमार लाल कायस्थ पनि पक्राउ परेका थिए। घरबाट विभिन्न योजनासम्बन्धी कागजात र मोबाइल डिभाइसहरू बरामद गरिएपछि डिजिटल फरेन्सिक परीक्षणका लागि पठाइएको अख्तियार स्रोतको भनाइ छ।
सिंह मधेश प्रदेश सरकारको आन्तरिक मामिला तथा कानुन राज्यमन्त्री रहँदा विकास योजनाको खरिद–बिक्रीमा प्रत्यक्ष संलग्न रहेको आरोपमा अनुसन्धान भइरहेको छ। अख्तियारले उनीमाथि आर्थिक चलखेल र पदको दुरुपयोग गरी लाभ उठाएको आशंकामा विस्तृत छानबिन अघि बढाएको छ।
सांसद स्तरको नेतामाथि भ्रष्टाचारको आरोपमा पक्राउ मधेश प्रदेशको राजनीतिक अखडा र समग्र संघीय राजनीति दुबैमा चासोको विषय बनेको छ। यदि आरोप पुष्टि भएमा यसले प्रदेश सरकारको पूर्वअवधिमा व्यापक अनियमितता भएको संकेत दिन सक्छ।
