काभ्रेपलाञ्चोक । कोशीपारिस्थित भुम्लु गाउँपालिकालाई ‘पूर्ण खोप सुनिश्चिता र दिगोपना पालिका’ घोषणा गरिएको छ । ‘स्थानीय स्रोतको उपयोग, स्वामित्व र सहभागिता पूर्ण खोप सुनिश्चितता हाम्रो प्रतिबद्धता’ नाराका साथ भुम्लु गाउँपालिका स्वास्थ्य शाखाको आयोजनामा पूर्ण खोप सुनिश्चितता गर्ने सम्पूर्ण प्रक्रिया पूरा गरी सो घोषणा गरिएको हो ।
पालिकालाई पूर्ण खोप सुनिश्चिता र दिगोपना पालिका’ घोषणा गर्दै जिल्ला खोप समन्वय समितिका अध्यक्ष एवं जिल्ला समन्वय समितिका प्रमुख दीपक गौतमले भुम्लु गाउँपालिका जिल्लाका १३ वटा पालिकामध्येको पूर्ण खोप सुनिश्चितमा यो तेस्रो पालिका भएको बताए ।
यसका लागि खोप लगाउन गाउँगाउँ र घरघरसम्म पुगेर सचेतना जगाउने काममा भूमिका खेलेका महिला स्वास्थ्य स्वयंसेविका र स्वास्थ्यकर्मीको अथक प्रयासले सम्भव भएको बताउँदै उनले आगामी दिनमा त्यसलाई दिगोपना दिनका लागि पनि उतिकै भूमिका खेल्नुपर्नेमा जोड दिए ।
सो क्रममा उनले भुम्लु गाउँपालिकाले पालिका स्तरीय बालसञ्जाल गठनको घोषणा गरेर अब वडा र सिंगो गाउँपालिकालाई नै बालमैत्री घोषणा गर्न थप सहयोग पुगेको बताए ।
कार्यक्रममा भुम्लु गाउँपालिका अध्यक्ष प्रेमबहादुर भुजेलले पालिका स्वास्थ्य शाखाको सक्रियतामा स्वास्थ्यकर्मी, महिला स्वास्थ्य स्वयंसेविकाको मेहनतले सिंगो पालिकालाई पूर्ण खोप सुनिश्चितता र दिगोपना घोषणा गर्न सफल भएको बताए । उनले बालमैत्री शासन व्यवस्था स्थापनाका लागि अब पालिकालाई बालमैत्री पालिका घोषणा गर्ने काममा लागिपर्न बालसञ्जाल र महिला बालबालिका तथा ज्येष्ठ नागरिक शाखाको सक्रियता महत्त्वपूर्ण रहने विश्वास व्यक्त गरे ।
गाउँपालिका उपाध्यक्ष जितेन्द्रमान तामाङले खोपको सुनिश्चिततासँगै अब दिगोपना दिनका लागि बालबालिकाका अभिभावकहरूलाई पनि खोपको महत्त्व बुझाउन जरुरी रहेको बताए ।
कार्यक्रममा जनस्वास्थ्य कार्यालय काभ्रेपलाञ्चोकका खोप अधिकृत पार्थमणि न्यौपानेले बालबालिकाको शारीरिक र मानसिक विकासका लागि एवं रोगसँग लड्न सक्ने शक्ति विकासका लागि जन्मेको १५ महिनाभित्रमा गुणस्तरीय खोप लगाइसक्नुपर्ने बताए ।
त्यस्तै १५ महिनाभित्र खोप लगाएको सुनिश्चितका लागि १६ देखि २३ महिनाभित्रका बालबालिकाको खोजी गरी खोप लगाएको सुनिश्चितता गर्ने काम सम्पन्न गरेर पालिकालाई पूर्ण खोप सुनिश्चितता घोषणा गरेको उनले जानकारी दिए।
गाउँपालिका स्वास्थ्य शाखा अधिकृत बालकृष्ण गौतमले गाउँपालिकाका सबै वडामा गत चैत १६ गतेका दिनसम्ममा १६ महिनादेखि २३ महिनासम्मका सबै बालबालिकाले १५ महिनाको उमेरभित्र राष्ट्रिय खोप तालिकाअनुसार पाउनुपर्ने सबै खोप दिलाइ पूर्ण खोप पाएको सुनिश्चित गरिएकाले गाउँपालिकालाई पूर्ण खोप सुनिश्चितता र दिगोपना घोषणा गरिएको बताए ।
पालिकाका सबै महिला स्वास्थ्य स्वयंसेविकालाई सम्मान गर्नुका साथै पालिकाका सबै स्वास्थ्यमध्ये कार्यसम्पादनमा पहिलो हुन सफल वडा नं ९ ज्याम्दी स्वास्थ्य चौकी, दोस्रो हुन फल वडा नं २ सिमथली स्वास्थ्य चौकी र वडा नं ८ का भुम्लुटार स्वास्थ्य चौकीलाई सम्मान पत्रसहित सम्मान गरिएको छ ।
काभ्रेपलाञ्चोकमा स्थानीय तहको स्रोतको परिचालन गरेर पालिकामा पूर्ण खोप सुनिश्चितता र दिगोपना पालिका घोषणा गर्ने अभियान निरन्तर अगाडि बढिरहेको छ । जिल्लाका १३ पालिकामध्ये अहिलेसम्ममा नमोबुद्ध नगरपालिका र मण्डनदेउपुर नगरपालिकालाई पूर्ण खोप सुनिश्चितता र दिगोपना घोषणा गरिसकेको छ ।
