काठमाडौं । प्रतिनिधिसभाको बैठक फेरि अवरुद्ध भएको छ। भिजिट भिसा प्रकरणमा गृहमन्त्री रमेश लेखकको राजीनामाको माग गर्दै प्रमुख प्रतिपक्षी दलहरूद्वारा गरिँदै आएको निरन्तर विरोधका कारण सोमबारको बैठक पनि सञ्चालन हुन सकेन। यो प्रतिनिधिसभा बैठक चौधौँ पटक स्थगित भएको हो।
सोमबार दिउँसो बैठक सुरु हुनासाथ प्रमुख प्रतिपक्षी दलका सांसदहरू उठेर नाराबाजीमा उत्रिएपछि सभामुख देवराज घिमिरेले सुरु भएको केही क्षणमै बैठक आधा घण्टाका लागि स्थगित गरे। त्यसपछि सहमति नजुटेपछि बैठक बुधबार दिउँसो १ बजे सम्मका लागि स्थगित गरिएको घोषणा गरियो।
गत जेठ १३ गतेदेखि लगातार प्रतिपक्षी दलहरूको अवरोधका कारण संसद बैठक सञ्चालनमा आउन सकेको छैन। भिजिट भिसाको नाममा भएको मानव तस्करी प्रकरणमा संलग्न व्यक्तिहरूको छानबिन र गृह मन्त्रीको जिम्मेवारीको मागलाई लिएर विपक्षीले संसद अवरुद्ध गर्दै आएको हो।
यसबीच जेठ १५ गते सरकारले संसदमा प्रस्तुत गरेको आगामी आर्थिक वर्ष २०८१/८२ को बजेटमा पनि कुनै छलफल सुरु हुन सकेको छैन। बजेटमाथिको सामान्य छलफल स्थगित भएसँगै नीति तथा कार्यक्रम र बजेट पारित गर्ने संवैधानिक प्रक्रिया प्रभावित हुन थालेको चिन्ता सांसदहरूबीच बढ्दो छ।
सरकार र प्रतिपक्षबीच सहमतिका लागि पटक–पटक छलफल भए पनि समाधानको सूत्र अझै फेला परेको छैन। संसद पुनः सञ्चालन हुने या नहुने भन्ने अवस्था विपक्षीको अडान र सरकारको प्रत्युत्तरमा निर्भर रहँदै गएको छ।
