काठमाडौँ । प्रतिनिधि सभाको बैठक आजपनि सुचारु हुन सकेको छैन । अपराहन्न १ बजेका लागि तोकिएको बैठक विपक्षी दलहरुको बैठकका कारण अहिलेसम्म संचालन हुन सकेको छैन ।
सभामुखको सचिवालयले सभामुख देवराज घिमिरे विपक्षी दलको बैठकको निर्णय कुरेर बसेको जानकारी दिएको छ ।
माओवादी प्रमुख सचेतक हितराज पाण्डेले आफूहरूको बैठक सकिएपछि निर्णय लिएर आउने सभामुखलाई जानकारी दिएपछि सभामुखसहित सत्ता पक्ष विपक्षी दलको निर्णय कुरेर बसेको छ ।
आजको विपक्षी दलहरुको बैठकमा माओवादी केन्द्रका अध्यक्ष पुष्पकमल दाहाल प्रचण्डले सत्तारुढ दल नेपाली कांग्रेससँग भएको छलफलको ब्रिफिङ गर्ने र सोहि अनुसार विपक्षी दलहरुको धारणा बनाउने बुझिएको छ । प्रचण्डले शुक्रबार र शनिबार कांग्रेस नेताहरुसँग छलफल गरेका थिए ।
