काठमाडौँ । नेपालको पछिल्लो राजनीतिक घटनाक्रमलाई लिएर भारतले मुख खोलेको छ । बुधबार भारतीय विदेश मन्त्रालयले आधिकारिक रूपमा नेपालबारे धारणा सार्वजनिक गरेको हो । जसमा या घटना नेपालको आन्तरिक मामिला भनेको छ ।
भारतीय विदेश मन्त्रालयका प्रवक्ता अरिन्दम बागचीले विभिन्न सञ्चारमाध्यमबाट सोधिएको प्रश्नको उत्तर दिँदै नेपालको पछिल्लो घटनाक्रमलाई भारतले आन्तरिक मामिलाका रुपमा हेरेको बताएका हुन् ।
‘हामीले नेपालको पछिल्लो राजनीतिक घटनाक्रमलाई ध्यानपूर्वक हेरेका छौं । यसलाई हामी नेपालको आन्तरिक मामिलाका रुपमा नै लिन्छौँ,’ उनले भने ।
नेपालले अहिलेको समस्या आफै समाधान गर्नुपर्ने पनि भारतीय विदेश मन्त्रालयको भनाइ छ । ‘नेपालले पछिल्लो समस्या आफ्नै घरेलु ढाँचा र लोकतान्त्रिक प्रक्रियामा रहेर समाधान गर्नुपर्छ,’ भारतीय विदेश मन्त्रालयले भनेको छ ।
नेपालको राजनीतिमा भारतीय हस्तक्षेप रहेको भन्ने धारणा विकास भएको समयमा भारतीय विदेश मन्त्रालयद्वारा स्पष्टीकरण आएको हो ।
