काठमाडौं । गोरखाको बूढीगण्डकी नदीमा आइतबार बिहान आएको आकस्मिक बाढीको वास्तविक कारण पत्ता लगाउन भूगर्भविद्सहित तीन सदस्यीय टोली परिचालन गरिएको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणले बाढीको उत्पत्ति र घटनाको कारणबारे अध्ययन गर्न ड्रोनसहितको प्राविधिक टोली खटाइएको जनाएको हो ।
प्राधिकरणले आइतबार दिउँसो जारी गरेको प्रेस नोटमा घटनाको कारण पत्ता लगाउन ड्रोन तथा भूगर्भविद्सहितको तीन सदस्यीय टोली परिचालन गरिएको उल्लेख छ । बूढीगण्डकी नदीमा आएको बाढीले गोरखाका विभिन्न स्थानमा ठूलो भौतिक क्षति पुर्याएको छ । बाढीले घर, पुल तथा अन्य भौतिक संरचनामा क्षति पुर्याउनुका साथै बस्तीहरूलाई जोखिममा पारेको छ ।
यसैबीच, बाढी प्रभावित क्षेत्रबाट हालसम्म ४९ जनाको उद्धार गरी सुरक्षित स्थानमा सारिएको प्राधिकरणले जनाएको छ । बाढीको वास्तविक कारण, सम्भावित जोखिम र थप क्षति हुन नदिन आवश्यक उपाय पहिचान गर्न प्राविधिक टोलीको अध्ययनलाई महत्वपूर्ण रूपमा हेरिएको छ ।
