काठमाडौँ। सरकारले पूर्ण तथा अतिअशक्त अपाङ्गता भएका व्यक्तिका लागि व्यक्तिगत सहयोगी सेवा सञ्चालनसम्बन्धी कार्यविधिको मस्यौदा तयार गरी रायसुझावका लागि अर्थ मन्त्रालयमा पठाएको छ ।
राष्ट्रियसभाको आजको बैठकमा सांसदको प्रश्नको जवाफ दिँदै महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षामन्त्री सीता बादीले कार्यविधिको मस्यौदा रायसुझावका लागि पठाइएको जानकारी दिइन् ।
उनका अनुसार अपाङ्गता भएका व्यक्तिको अधिकारसम्बन्धी ऐन, २०७४ र नियमावली, २०७७ को नियम ९ बमोजिम सामुदायिक सहायता तथा व्यक्तिगत सहयोगी सेवाको व्यवस्था कार्यान्वयनका लागि चालु आर्थिक वर्षमा अध्ययन गरिनेछ ।
“मन्त्रालयले व्यक्तिगत सहयोगी सेवासम्बन्धी कार्यविधिको मस्यौदा तयार गरी २०८०/०९/१८ को निर्णयअनुसार रायसुझावका लागि अर्थ मन्त्रालयमा पठाएकामा तत्कालीन अवस्थामा स्पष्ट राय प्राप्त नभएकाले चालु आर्थिक वर्ष २०८३/८४ को वार्षिक स्वीकृत कार्यक्रमअन्तर्गत व्यक्तिगत सहयोगी सेवासम्बन्धमा अध्ययन गर्ने कार्यक्रम रहेको छ,” उनले भनिन् ।
अध्ययनमा व्यक्तिगत सहयोगी सेवाको आवश्यकता, सेवा प्राप्त गर्ने व्यक्तिको अवस्था, सेवा प्रदायकको भूमिका, सेवा सञ्चालनको मापदण्ड, आर्थिक दायित्व तथा कार्यान्वयनको प्रभावकारितालगायत विषय समेटिने मन्त्री बादीले बताइन् ।
मन्त्रालयको अपाङ्गता व्यवस्थापन सूचना प्रणालीलाई सामाजिक सूचना व्यवस्थापन प्रणालीमा पूर्ण रूपमा एकीकृत गरी ७५३ वटै स्थानीय तहमा विस्तार गर्ने काम भइरहेको उनले जानकारी दिइन् ।
यसबाट अपाङ्गता भएका व्यक्तिको अद्यावधिक तथ्याङ्क संकलनसँगै व्यक्तिगत सहयोगी सेवा आवश्यक पर्ने व्यक्तिको पहिचान तथा आवश्यकताको आकलन गर्न सहयोग पुग्ने उनले बताइन् ।
मन्त्री बादीले व्यक्तिगत सहयोगी सेवा प्रभावकारी, पारदर्शी, पहुँचयोग्य र दिगो बनाउन आवश्यक कानुनी तथा संस्थागत व्यवस्था गरिने बताइन् । त्यसका लागि अपाङ्गता भएका व्यक्तिका संस्था, स्थानीय तह, प्रदेश सरकार, सम्बन्धित निकाय तथा विज्ञसँग परामर्श गरिने उनले जानकारी दिइन् ।
