काठमाडौं । अपर त्रिशूली–१ जलविद्युत् आयोजनाको सुरुङबाट जीवितै उद्धार गरिएका चिनियाँ नागरिकलाई काठमाडौंस्थित चिनियाँ राजदूतावासको टोलीले भेट गरेको छ ।
शनिबार उद्धारपछि काठमाडौंको छाउनीस्थित नेपाली सेनाको अस्पतालमा ल्याइएका उनलाई दूतावासका अधिकारीहरूले अस्पतालमै पुगेर भेटेका हुन् ।
नेपाली सेनाका प्रवक्ता राजाराम बस्नेतका अनुसार उद्धार गरिएका चिनियाँ नागरिकको स्वास्थ्य अवस्था अहिले स्थिर रहेको छ । अस्पतालमा आवश्यक उपचार तथा स्वास्थ्य निगरानी भइरहेको उनले जानकारी दिए ।
भोटेकोशी बाढीपछि अपर त्रिशूली–१ जलविद्युत् आयोजनाको सुरुङमा फसेका उनलाई लामो प्रयासपछि शनिबार उद्धार गरिएको थियो । उद्धारलगत्तै उनलाई स्वास्थ्य परीक्षण तथा उपचारका लागि नेपाली सेनाको अस्पताल पुर्याइएको हो ।
