काठमाडाैँ । सरकारले सबै मन्त्रालय, विभाग, कार्यालय तथा स्थानीय तहहरूमा कार्यरत कर्मचारीहरूको उपस्थितिको अभिलेखलाई व्यवस्थित र पारदर्शी बनाउन विद्युतीय हाजिरी प्रणाली अनिवार्य रूपमा कार्यान्वयन गर्न निर्देशन दिएको छ।
सङ्घीय मामिला तथा सामान्य प्रशासन मन्त्रालयले जारी गरेको सूचनामा सबै निकायहरूलाई आफ्नो कार्यस्थलमा विद्युतीय हाजिरी प्रणाली लागू गर्न र यदि पहिले नै कार्यान्वयन नभएको भए तत्काल व्यवस्था मिलाउन आग्रह गरिएको छ। मन्त्रालयका अनुसार अब कर्मचारीहरूको दैनिक उपस्थितिको सम्पूर्ण विवरण—आउने र जाने समय सहित—अनिवार्य रूपमा विद्युतीय प्रणालीमार्फत मात्र अभिलेख गर्नुपर्नेछ।
मन्त्रालयले प्रत्येक १५ दिनको हाजिरी विवरण प्रिन्ट गरी सम्बन्धित अधिकारीबाट प्रमाणित गराएर कार्यालयमा सुरक्षित रूपमा राख्न समेत निर्देशन दिएको छ। यो व्यवस्था मन्त्रालयको सचिवस्तरको मिति २०८३ वैशाख ८ गतेको निर्णयअनुसार कार्यान्वयन गर्न भनिएको हो।
सूचनामा सूचना प्रविधि शाखालाई सम्बन्धित पत्र वेभसाइटमा समेत प्रकाशन गर्न निर्देशन दिइएको छ, जसले पारदर्शिता र पहुँच सुनिश्चित गर्ने अपेक्षा गरिएको छ।
