काठमाडौं । नेपाली कांग्रेसका सभापति शेरबहादुर देउवा आज बस्ने पार्टी पदाधिकारी बैठकमा सहभागी नहुने भएका छन्। देउवाको अनुपस्थितिमा उपसभापति पूर्णबहादुर खड्काको अध्यक्षतामा बैठक बस्ने भएको हो।
बैठक ललितपुरस्थित एक होटलमा दिउँसो १ बजेका लागि तय गरिएको छ। जेनजी आन्दोलनपछि देउवा पार्टीका प्रत्यक्ष बैठकहरूमा सहभागी भएका छैनन्, तर उनले केही नेताहरूसँग भर्चुअल माध्यमबाट छलफल गर्दै आएका छन्।
गत भदौ २४ गतेको जेनजी आन्दोलनको दोस्रो दिन बुढानीलकण्ठस्थित देउवा निवासमा भएको आक्रमणमा देउवा र उनकी पत्नी आरजु राणा घाइते भएका थिए। आगजनीपछि उनीहरू हाल ललितपुरमा बस्दै आएका छन्, तर उनीहरूको वर्तमान बसोबास स्थान खुलाइएको छैन।
आजको बैठकमा आगामी असोज २६ गते बस्ने केन्द्रीय समितिको बैठकका एजेन्डामाथि छलफल हुने जनाइएको छ।
