काठमाडौं । नेपाली कांग्रेसका महामन्त्री गगन थापाले पार्टीको पुनर्गठनलाई सहज बनाउन आफू पद त्याग्न तयार रहेको बताएका छन्।
सामाजिक सञ्जालमार्फत विचार व्यक्त गर्दै थापाले जेनजी आन्दोलनपश्चात् कांग्रेसले नयाँ ढाँचामा आफूलाई पुनर्गठित गर्नुपर्ने आवश्यकता रहेको उल्लेख गरेका छन्। उनले पार्टीलाई समयअनुकूल बनाउन नेतृत्व तहले त्याग गर्न सक्नुपर्नेमा जोड दिँदै “यदि मेरो पदबाट हट्नु नै पुनर्गठनको बाटो सहज हुन्छ भने म तयार छु” भन्ने सन्देश दिएका छन्।
थापाले यसअघि पनि कांग्रेसलाई पुरानो संरचना र अभ्यासले मात्र चलाउन नसकिने बताउँदै आएका थिए। उनको भनाइ अनुसार, जेनजी आन्दोलनले देखाएको राजनीतिक चेतनालाई आत्मसात गर्दै पार्टीलाई नयाँ पुस्तामुखी बनाउन आवश्यक छ।
पार्टीभित्र थापाको यो अभिव्यक्तिलाई केही नेताले सकारात्मक पहलको संकेतका रूपमा हेरेका छन् भने केही नेताले यसलाई ‘राजनीतिक सन्देशभन्दा बढी केही होइन’ भन्दै सामान्य प्रतिक्रिया दिएका छन्।
