काठमाडौं । प्रधानमन्त्री केपी शर्मा ओलीले वीरगञ्जमा फैलिएको हैजा नियन्त्रणका लागि सरकारले नेपाली सेना, नेपाल प्रहरी र सशस्त्र प्रहरीका स्वास्थ्यकर्मी, डाक्टर र नर्स परिचालन गर्ने निर्णय गरेको जानकारी दिएका छन्।
शुक्रबार संसद्मा सम्बोधन गर्दै प्रधानमन्त्री ओलीले भने, “स्वास्थ्य मन्त्रालयको समन्वयमा तीव्र ढंगले प्रयास भइरहेको छ। रोग नियन्त्रण, बिरामीको उपचार र संक्रमण रोकथामका लागि आवश्यक सबै कदम चालिँदैछ।”
प्रधानमन्त्रीले बताउनुभयो कि हैजाको स्रोत पत्ता लगाउने काम भइरहेको छ। “यो रोग कहाँबाट फैलियो, ढल, खानेपानी वा अन्य स्रोतको छानबिन भइरहेको छ। स्वास्थ्य मन्त्रालयको अगुवाइमा रोकथाम, तत्काल निदान र उपचारमा विशेष ध्यान दिइएको छ,” उनले भने।
उनले सरकारको पहलअनुसार हैजा र झाडापखालाका औषधी निःशुल्क उपलब्ध गराइएको र नारायणी उपक्षेत्रीय अस्पतालमा बिरामीहरूको उपचार भइरहेको जानकारी दिए। कोरोनाकालमा नेपाली सेनाले बनाएको अस्पताललाई पनि उपचारका लागि प्रयोग गरिने तयारी भइरहेको छ।
प्रधानमन्त्रीको जानकारी अनुसार, वीरगञ्जमा हालसम्म ६२४ जना संक्रमित भएका छन् जसमा ४३७ जना निको भएर घर फर्किसकेका छन्। वर्तमानमा १८७ जना बिरामी उपचाररत छन्। पछिल्लो २४ घण्टामा मात्रै ८४ नयाँ बिरामी थपिएका छन् र ३ जनाको मृत्यु भइसकेको छ।
प्रधानमन्त्री ओलीले भने, “यस महामारी नियन्त्रणका लागि तीनै तहका सुरक्षा निकायका स्वास्थ्यकर्मी परिचालन गर्नु अपरिहार्य छ र आवश्यक बजेट व्यवस्थापन गरिनेछ।”
