काठमाडौं । नेकपा (एकीकृत समाजवादी) का तीन शीर्ष नेताले पार्टीको चौथो स्थापना दिवसको अवसरमा फरक–फरक धारणासहित आन्तरिक विवाद सतहमा ल्याएका छन्। ‘नेपाली विशेषताको समाजवाद’ विषयक विचार गोष्ठीमा बोल्दै सम्मानित नेता झलनाथ खनालले पार्टी निर्माणका लागि नयाँ अठोट आवश्यक रहेको भन्दै तत्कालै १०औँ महाधिवेशनले पारित गरेको दस्तावेज सार्वजनिक गर्न अध्यक्ष माधवकुमार नेपाललाई प्रश्न गरे। उनले नेपाली समाजवादलाई स्पष्ट कार्यदिशा, नीति र सिद्धान्तमार्फत अगाडि बढाउनुपर्नेमा जोड दिए।
वरिष्ठ नेता वामदेव गौतमले आफू पार्टीभित्र तेस्रो वरीयतामा रहे पनि कुनै आन्तरिक निर्णय प्रक्रियामा सहभागी नबनाइएको गुनासो गरे। उनले पार्टीलाई जनतामुखी बनाउन सशक्त अभियान सञ्चालन गर्नुपर्ने उल्लेख गर्दै तल्लो तहमा पुगेर २० लाख सदस्यता विस्तार गर्ने योजना अघि सारे।
कार्यक्रमको अन्त्यमा अध्यक्ष माधवकुमार नेपालले पार्टी नेतृत्वप्रति निरन्तर आलोचना बढिरहेको सन्दर्भमा अनुशासनहीन गतिविधि गर्ने कसैलाई पनि नछाड्ने चेतावनी दिए। उनले पार्टीको पक्षमा दृढताका साथ उभिनुपर्ने र भित्री असहमति बाहिर सार्वजनिक गरेर नेतृत्वमाथि आँच पुर्याउने प्रवृत्ति स्वीकार्य नहुने स्पष्ट पारे।
यसरी एउटै कार्यक्रमभित्र शीर्ष नेताहरूले आ–आफ्नै गुनासा र असन्तुष्टि राखेपछि समाजवादीभित्रको आन्तरिक विवाद अझ सतहमा आएको देखिएको छ।
