काठमाडौं । राष्ट्रिय प्रजातन्त्र पार्टी (राप्रपा)का सांसद धवलशमशेर राणाले चैत १५ गतेको तीनकुने घटनाप्रकरणमा थुनामा परेका मेडिकल व्यावसायी तथा धर्म संस्कृति तथा नागरिक बचाउ अभियानता दुर्गा प्रसाईबारे बल्ल मुख खोलेका छन् । सोही घटना प्रकरणमा अदालतको आदेशमा राप्रपा अध्यक्ष रविन्द्र मिश्र जनही तीन लाख धरौटीमा रिहा भएपछि उनले पहिलोपटक दुर्गा प्रसाईंको बारेमा प्रतिनिधिसभाको बैठकमा बोलेका हुन् । उनले भने,“तीनकुनेको घटना कुनै व्यक्तिगत आकस्मिकता होइन, राज्यको उत्तेजनाले भएको प्रतिक्रिया हो । ” यस्तै राणाले सो घटना सरकारको दमनकारी शैलीको परिणाम भएको आरोप लगाए।
सांसद राणाले प्रसाईंलाई ुनिमुखा जनताको पक्षमा आवाज उठाउने व्यक्ति भन्दै समर्थन जनाए। “प्रसाईं त तिनै निमुखाका लागि लडिरहेका छन्, तर राज्यले त्यसलाई दमन गर्यो,” भन्दै उनले सरकारको कार्यशैलीमाथि प्रश्न उठाए। तीनकुने घटनामा राज्यको भूमिकाले स्थिति चर्किएको भन्दै, राणाले सरकारले आत्मसमीक्षा गर्नुपर्ने र ‘आन्दोलन दबाउने होइन, सुन्ने प्रवृत्ति’ विकास गर्न आग्रह गरे।
उनको यो अभिव्यक्तिले राप्रपाले सडक आन्दोलन र प्रतिरोधको विषयमा कता उभिने हो भन्ने सन्देश दिन थालेको छ। दुर्गा प्रसाईंलाई समर्थन गर्दै राणा संसदभित्रै गर्जिएपछि, आगामी दिनमा उक्त घटनालाई लिएर राजनीतिक ध्रुवीकरण झनै गहिरिन सक्ने देखिएको छ।
