काठमाडौं । प्रधानमन्त्री सुशीला कार्कीले प्रतिनिधिसभाको आगामी निर्वाचन निष्पक्ष र पारदर्शी ढङ्गले सम्पन्न गराउने सरकारको प्रतिबद्धता दोहोर्याएकी छन्। उनले लोकतान्त्रिक प्रणाली सुदृढीकरण, आर्थिक समृद्धि र नागरिक अधिकारको सुनिश्चितताका लागि भयरहित मतदान वातावरण बनाउन सबै राजनीतिक दल, नागरिक समाज र समुदायहरूको सहयोग अपेक्षा गरेकी छन्।
भक्तपुरको मध्यपुर थिमिमा राष्ट्रिय विभूति शङ्ख धर साख्वाः प्रतिष्ठानद्वारा आयोजित माल्यार्पण तथा सम्मान समारोहमा प्रधानमन्त्री कार्कीले भनिन्, “सरकारले २०८२ फागुन २१ गते निर्वाचन सम्पन्न गराउने जिम्मेवारी पाएको छ। यो निर्वाचन निष्पक्ष, पारदर्शी र विश्वासिलो बनाउनु हाम्रो साझा दायित्व हो।”
प्रधानमन्त्री कार्कीले गत भदौ २३ र २४ गतेको जेनजी आन्दोलनमा ज्यान गुमाएका युवाप्रति श्रद्धाञ्जलि व्यक्त गर्दै आन्दोलनले उठाएका प्रश्नलाई शान्तिपूर्ण संवाद र संस्थागत सुधारमार्फत सम्बोधन गर्नुपर्ने बताइन्। उनले भनिन्, “युवाको ज्यान जाने जस्तो पीडादायी घटना दोहोरिनु हुँदैन। सरकार जनताको आवाज सुन्न र त्यसअनुसार काम गर्न प्रतिबद्ध छ।”
प्रधानमन्त्री कार्कीले नेपाल संवत्लाई व्यवहारमा ल्याउन सरकार गम्भीर रहेको बताइन्। उनका अनुसार, नेपाल राष्ट्र बैंकले जारी गर्ने नोटहरूमा नेपाल संवत् उल्लेख गर्ने प्रक्रियाबारे छलफल अघि बढाइसकिएको छ। साथै, सरकारी कागजात र अभिलेखमा नेपाल संवत् उल्लेख गर्न मन्त्रालयहरूलाई निर्देशन दिइसकेको उनले स्पष्ट पारिन्।
उनले भनिन्, “नेपाल संवत् कुनै राजाको आदेश वा युद्धको परिणाम होइन, यो जनताको परोपकार र त्यागबाट जन्मिएको लोक–संवत् हो। यसको संरक्षण र प्रवर्द्धन सरकारको जिम्मेवारी हो।”
शङ्ख धर साख्वाःप्रति सम्मान र प्रेरणा
कार्यक्रममा प्रधानमन्त्री कार्कीले शङ्ख धर साख्वाःको सामाजिक योगदान र आर्थिक समानताको दृष्टिको प्रशंसा गर्दै भनिन्, “साख्वाःले देखाएको मार्ग — व्यक्तिगतभन्दा सामूहिक हित, दलगतभन्दा राष्ट्रिय हित — नै हाम्रो भविष्यको दिशा हो।” कार्यक्रममा उनले साख्वाःको सालिकमा माल्यार्पण गर्दै प्रतिष्ठानद्वारा प्रकाशित वार्षिक बुलेटिन विमोचन गरिन्। साथै, संस्कृतिविद् छत्रबहादुर कायस्थ र नेपाः पासा पुचः अमेरिकालाई ‘शङ्ख धर सिरपाद सम्मान’ प्रदान गरिन्।
कार्यक्रममा प्रतिष्ठानका अध्यक्ष ज्ञानराम श्रेष्ठ, मध्यपुरथिमि नगरपालिकाका प्रमुख सुरेन्द्र श्रेष्ठ, तथा पूर्वअध्यक्षहरू श्यामकृष्ण मानन्धर र मदनकृष्ण श्रेष्ठले साख्वाःबारे अनुसन्धान र नेपाल संवत् प्रवर्द्धनलाई अझ गहिरो बनाउनुपर्नेमा जोड दिएका थिए।
प्रधानमन्त्री कार्कीको भनाइमा, “राष्ट्रिय अभिष्ट पूरा गर्न साख्वाःजस्तै दूरदर्शी सोच र सामूहिक भावना आवश्यक छ। निर्वाचन पनि त्यही एकताको अभ्यास बन्नुपर्छ।”
