काठमाडौं । श्रम संस्कृति पाटीका अध्यक्ष तथा निर्वाचित संघीय सांसद हर्क साम्पाङले आफ्नो नाममा कुनै पनि व्यक्तिगत सम्पत्ति नरहेको बताएका छन्। पछिल्लो समय सम्पत्तिबारे उठेका चासोबीच उनले सामाजिक सञ्जालमार्फत आफ्नो वास्तविक अवस्था सार्वजनिक गरेका हुन्। धरान उपमहानगरपालिकाका प्रमुखसमेत रहेका साम्पाङका अनुसार उनको पैतृक सम्पत्ति पनि आफ्नै नाममा नभई आमाको नाममा रहेको छ। उक्त सम्पत्ति खोटाङको केपिलासगढी गाउँपालिका–२ स्थित चोखाने गाउँमा रहेको भिरालो पाखो, खरबारी, बाँस र उतिस घारीमा सीमित रहेको उनले उल्लेख गरेका छन्।
उनले लेखेका छन्, “मेरो नाममा केही छैन, आमाको नाममा भिरालो पाखो र उतिस घारी मात्रै छ।” साथै, उक्त पुर्ख्यौली सम्पत्तिमा हालसम्म परिवारबीच अंशबण्डा नभएको पनि उनले स्पष्ट पारे। साम्पाङले वैदेशिक रोजगारीका क्रममा कमाएको सम्पत्तिबारे पनि जानकारी दिएका छन्। उनका अनुसार उनीसँग ४–५ तोला सुन र बैंक खातामा करिब २–४ लाख रुपैयाँ मात्रै रहेको हुन सक्छ।
हर्क साम्पाङ ले केही दिनभित्रै आफ्नो सम्पत्ति विवरण औपचारिक रूपमा सार्वजनिक गर्ने बताएका छन्। आफू सधैँ पारदर्शिता र जनउत्तरदायित्वमा विश्वास गर्ने भन्दै उनले उठेका प्रश्नहरूको जवाफ दिन यस्तो कदम चालेको स्पष्ट पारे। सम्पत्तिबारे भइरहेको चर्चा र आलोचनालाई सम्बोधन गर्दै उनले आफ्नो जीवनशैली र आर्थिक अवस्थाबारे खुलेर जानकारी दिएका हुन्। उनका अनुसार सार्वजनिक पदमा रहेका व्यक्तिले आफ्नो सम्पत्तिबारे स्पष्ट हुनु आवश्यक छ।
समग्रमा, साम्पाङको यो अभिव्यक्तिलाई पारदर्शिता प्रदर्शन गर्ने प्रयासका रूपमा हेरिएको छ, जसले स्थानीय तहका जनप्रतिनिधिहरूको उत्तरदायित्वबारे बहसलाई पुनः ताजा बनाएको छ।
