काठमाडौँ । नेकपा एमालेको पार्टी पुनर्गठन कार्यदल र सचिवालय बैठक आज बस्दैछ।
केन्द्रीय कमिटी बैठकअघि निर्वाचन समीक्षा, केन्द्रीय कमिटी बैठकमा प्रस्तुत हुने प्रतिवेदन तथा पार्टी पुनर्गठन कार्यदलको प्रतिवेदनबारे निष्कर्षमा पुग्न सचिवालय बैठक बस्न लागेको हो।
एमाले प्रचार विभाग प्रमुख निरज आचार्यका अनुसार पुनर्गठन कार्यदलको बैठक बिहान ९ बजे पार्टी कार्यालय च्यासलमा बस्नेछ। कार्यदलको बैठकपछि आजै दिउँसो १ बजे सचिवालय बैठक पनि च्यासलमै बस्नेछ।
यसअघि कार्यदलमा दुईवटा छुट्टाछुट्टै प्रतिवेदन प्रस्तुत भएकाले एउटै प्रतिवेदन तयार गर्न आजको बैठक बोलाइएको हो। अघिल्लो बैठकमा प्रतिवेदनबारे समझदारी जुट्न नसकेपछि आजको बैठकबाट निष्कर्ष निकाल्ने तयारी गरिएको छ।
कार्यदल र सचिवालय बैठकपछि भोलिदेखि एमालेको केन्द्रीय कमिटी बैठक सुरु हुनेछ। बैठक असोज ७ गतेसम्म चल्ने कार्यतालिका रहेको छ।
केन्द्रीय कमिटी बैठक ललितपुरको भनिमण्डलस्थित रामबाग महलमा बस्ने प्रचार विभाग प्रमुख आचार्यले जानकारी दिए। बैठकमा अध्यक्ष केपी शर्मा ओलीले प्रतिवेदन प्रस्तुत गर्ने भएका छन्।
