भक्तपुर । मनोहरा खोला किनारस्थित सुकुमबासी बस्तीमा अनधिकृत रूपमा बनेका घरटहरा हटाउने काम आज पनि जारी रहेको छ ।
बाँकी रहेका संरचना हटाउन १३ वटा डोजर प्रयोग गरी बिहानैदेखि भत्काउने काम अघि बढाइएको हो । करिब ८ सय घरटहरामध्ये करिब ६० प्रतिशत संरचना हिजो नै हटाइसकिएको छ ।
अवैध संरचना हटाउने क्रममा नेपाल प्रहरी र काठमाडौं महानगरपालिकाका नगर प्रहरी परिचालन गरिएको छ ।
जिल्ला प्रहरी परिसर भक्तपुरका प्रमुख प्रहरी उपरीक्षक सूर्यबहादुर खड्काका अनुसार अधिकांश घरटहराबाट सामान निकालेर खाली गरिएपछि भत्काउने काम अघि बढाइएको हो ।
सरकारले काठमाडौं उपत्यकाका नदी किनार तथा जोखिमयुक्त सार्वजनिक र सरकारी जग्गा खाली गर्ने अभियानअन्तर्गत उक्त क्षेत्रमा घरटहरा हटाउने काम सुरु गरेको हो ।
