काठमाडौं । नेपाली कांग्रेस का सभापति गगन थापा ले राजनीतिक नेतृत्वलाई जिम्मेवार अभिव्यक्ति दिन आग्रह गरेका छन्। सुर्खेतमा आयोजित चुनावी सभालाई सम्बोधन गर्दै उनले सरकार सञ्चालन र भाषणबाजी फरक विषय भएको स्पष्ट पारे।
उनले अप्रत्यक्ष रूपमा राष्ट्रिय स्वतन्त्र पार्टी का सभापति रवि लामिछाने लाई लक्षित गर्दै संसदलाई “चटक देखाउने ठाउँ” का रूपमा प्रयोग गर्न नहुने बताए। केही दिनअघि पूर्वाधार विकासमा ढिलासुस्ती अन्त्य गर्न ४१ वटा कानुन संशोधन आवश्यक रहेको अभिव्यक्ति दिएपछि लामिछानेले गरेको टिप्पणीप्रति प्रतिक्रिया दिँदै थापाले भने, “प्वाक्क बोल्दैमा कानुन बदलिँदैन, प्रक्रिया र बहस चाहिन्छ।”
थापाले संविधान संशोधन र कानुनी सुधार दीर्घकालीन सोच र अनुभवको विषय भएको उल्लेख गरे। “संविधान बनाउँदाका दुःख–कठिनाइ हामीले भोगेका छौँ। त्यसलाई सच्याउने कुरा हल्का टिप्पणीले सम्भव हुँदैन,” उनले भने। थापाले बालेन शाह को हालैको अभिव्यक्तिप्रति पनि प्रतिक्रिया जनाए। काठमाडौँ महानगरपालिकाको बजेट खर्च गर्न नसक्ने अवस्थाबीच कर्णाली विकासका लागि ठूलो रकम जुटाउने दाबीलाई उनले अव्यावहारिक भने।
“कर्णाली र काठमाडौँको आर्थिक संरचना फरक छ,” थापाले भने, “कर्णाली प्रदेशको वार्षिक आय करिब ५२ करोड छ, जबकि काठमाडौँ महानगरमा अर्बौँ राजस्व संकलन हुन्छ। तुलना गर्दा यथार्थ हेर्नुपर्छ।” थापाले वैकल्पिक शक्तिको नाममा समाजमा उत्तेजना र घृणा फैलाउने प्रवृत्तिबाट सचेत रहन आग्रह गरे। “देशलाई अहिले आगो र रिस होइन, सोच्ने क्षमता भएको नेतृत्व चाहिएको छ,” उनले जोड दिए। निर्वाचन नजिकिँदै जाँदा प्रमुख दलहरूबीच आरोप–प्रत्यारोप चर्किँदै गएको छ। यसबीच थापाको अभिव्यक्तिले राजनीतिक संवादलाई जिम्मेवार र नीतिमुखी बनाउनुपर्ने सन्देश दिएको विश्लेषण गरिएको छ।
